Inrinni khan National Students of India (NSUI), Mizoramin Myanmar raltlante tana Congress party hminga vehbur an khawnte chu Myanmar Refugee Relief Committee (MRRC) President Vanlalchhana hnenah Lalrindika Ralte, MLA-in a hlan.
Congress Bhavan Golden Hall-a tanpuina hlanna hun buatsaih a ni. He hunah hian tanpuina hlantu chuan thu sawiin, MPCC President Lal Thanhawla’n refugee status pe turin theihtawp chhuah mah se, chhanna mumal a la awm thei lo chu pawi a tih thu a sawi a. Mizoram mipuiin Myanmar raltlante harsatna a hriatpuiin a tawrhpui thu sawiin, “Mi mal ang leh MPCC ang pawhin min mamawhna apianga che turin kan inbuatsaih a ni tih min hriatsak ula, in tan kan awm reng a ni tih in hre reng dawn nia,” a ti.
Lalrindika Ralte chuan, “Kum zabi 21-na kan thleng tawh a, thuneihna thlakhlelh avang leh mahni hmasialna avanga mahni mihringpuite pawhin tuar mah se pawi ti lo khawpa thuneihna thlahlel an la awm chu a vanduaithlak,” a ti a. “Chutiang hmuna kan unau, kan Mizopuite a tuartu an han ni hi a pawi ka ti hle a, ram ralmuang in neih leh vat theih hi ka duh a ni. Politics pawimawhzia hi vawiina kan hun hman atang pawh hian a lang chiang hle a ni,” a ti bawk.
Myanmar Refugee Relief Committee President Vanlalchhana pawhin thu sawiin, “Khatia Myanmar boruak a chhiat a, Mizoram pan an ngaih hnu khan NGO For Myanmar din a ni a, Aizawl district chauh a huam avangin a zim deuh kan ti a, ‘Myanmar Refugee Relief Committee din ang u,’ kan han ti leh a. Ram dang atang leh Mizoram atanga kan sum hmuhte chu hmun hrang hrang a relief camp leh a petute inkar pein, a petu leh dawngtute inkara bridge (lei)-ah kan lo tang ve a ni,” tiin, Congress party hian he lai Mizo mai ni lo, ram dang danga Mizote a hmangaihzia hretu an nih thu leh an thlamuanpui tak zet thu a sawi.
He hunah hian PB Lalsawmliana, Secretary, PAC, MPCC-in a kaihruai a, vehbur khawntu, NSUI (Mizoram) President RB Lalmalsawma’n report a pe bawk.
Myanmar raltlante tanpui nana MPCC thilpek hi buhfai bag 30, thawmhnaw eng emaw zat, medical equipment – Rs 30,000 man, pawisa fai Rs. 20,000 leh bungraw phurhna tur motor hmanna tur Rs. 30,000 a ni.