Ruah sur nasa vangin Chennai leh district pathumah sikul chawlh puang


Tamil Nadu Chief Minister MK Stalin chuan Pathianni khan Chennai leh a thenawm district pathum – Kancheepuram, Thiruvallur leh Chengalpattu-a sikulte chu ruah sur nasa lutuk avangin ni hnih lo awm leh chhung chawlh a puang.
Chennai-ah hian Inrinni zan atang khan ruah tam takin a nuai mek a, khawpuiah tui a tling nasa hle.
Tual chhung roreltute chuan mipuite chu Poondi, Chembarambakkam leh Puzhal tuikhuaha tuite a sah then dawn tih hrilhin inralring turin an ngen.
Tamil Nadu State Disaster Management Authority chuan a tul huna che chhuak thei turin National Disaster Response Force team li an inrin reng thu a sawi.
Chengalpet leh Tiruvallur-ah team khat ve ve awmin Madurai-ah team hnih an awm thung.
Saidapet, Velachery, Adambakkam, Madipakkam leh West Mambalam-ah chuan tui chim chin chu feet hnih atanga thum velin a sang tawh niin news agency PTI chuan a tar lang.
Lei hnuai rel kalkawng pawh hmun tam takah feet eng emaw zata thukin tuiin a chim a. Chenna in thenkhat pawh a chim a, a chengte chu hmun him lama insawn tura tih an ni.
Chief Minister Stalin chuan Perambur Barracks road, Otteri bridge leh Padi-a ruah sur nasain a tihbuaite chu a tlawh niin news agency ANI chuan a tar lang.
Stalin chuan Dravida Munnetra Kazhagam (DMK) hruaitu, MLA leh MP te chu mipui mangangte pui turin a ti a. Health Secretary J Radhakrishnan leh Greater Chennai Corporation Commissioner Gagandeep Singh Bedi leh mi pawimawh dangte chuan Chennai-a tuiin a chim laite enin kawngpui leh mihring chenna laia tui tlingte a luan chhuah chak dan turte an enpui.
Health minister chuan Chennai-ah hian Inrinni zan atanga darkar 12 chhungin ruah cm 20 zet an dawng tih a sawi.
Indian Meteorological Department (IMD)-in a chhinchhiah dan chuan Chennai hian Inrinni zan atang khan ruah cm 10 dawng tawhin a chhehvelah cm 23 a tla tawh bawk.
IMD hian Tamil Nadu leh a thenawm, Puducherry chu Pathianniah ruah a sur dawn tih sawi lawkin inralring tura tiin ‘red alert’ category-ah a dah sa a ni.

Leave a Reply

Your email address will not be published. Required fields are marked *

error: Content is protected !!