Supreme Court judge, Justice Uday Umesh Lalit-a’n Inrinni khan Rawpuichhipah dan chungchang mipuite hrilhhriatna hun a hmanpui.
National Legal Services Authority (NALSA) executive chairman ni bawk, Justice Lalit-a hi Rawpuichhip-ah hian Gauhati High Court judge pahnih – Justice Michael Zothankhuma leh Justice Nelson Sailo ten an tawiawm a ni.
Justice Lalit chuan a thlawna dan chungchanga inpuihna, legal aid dawn chu ram danpuiin khua leh tuite dikna leh chanvo a pek, constitutional right a nih thu sawiin, hei hian mi tin hnen a thleng phak ngei tur a nih thu a sawi a. Hemi kawngah hian legal services authority-te an pawimawh tih sawiin, campaign kaltlang hian mipuiten dan hnuaia an dikna leh chanvo dik dak an hre thei dawn tih a sawi.
Supreme Court judge chuan central sorkar leh state sorkarin ruahmanna an siamah hamthatna dawngtu turin an dawng ngei em tih te, hemi kawngah hian harsatna an nei em tih en leh finfiah te pawh NALSA huang chhungah a tel tih a sawi bawk.
Legal awareness campaign-ah hian Justice Michael Zothankhuma leh Justice Nelson Sailo te pawhin thu sawiin Mizorama thubuai dinhmun te, dan leh hrai chungchanga mipuite hriat tur pawimawhte an sawi.
Chief judicial magistrate, Aizawl, Secretary, Aizawl District Legal Services Authority ni bawk, Julie Lalrinzami’n The Mizo Marriage, Divorce & Inheritance of Property Act, 2014 chungchanga hriat tur pawimawhte a sawi a. Social media-in a hrin chhuah inpuh hmingchhiatna a pawi theihziate leh dan hnuaia a hremna chungchangte bakah kumtlinglote chunga mipat hmeichhiatna lam hawia pawikhawihna leh hleihlenna a thlena dan hman ber POSCO Act, 2012 chungchang leh a hremna natzia te a sawi bawk.
Justice Lalit hian Zirtawpni khan Aizawl thlengin, Reiek-ah cleanliness drive-cum-legal awareness campaign kharna hun a hmanpui nghal a. Mizoram a thlen tirh atanga a mit la em emtu chu faina kawnga Mizoram hlawhtlinna a nih thu a sawi.
Kawng dungte fai a tih thu Justice Lalit chuan sawiin, mipui hmel hmuh a nuamin mipuite khawsak phung pawh a felfai hle nia a hmuh thu a sawi a. Faina kawngah Mizoramin tun aiin hma a la sawn ngei a rin thu sawiin, rorelna dik mi tin hmaah chhawpchhuah a nih theihna tura a puanzar hna Mizoram State Legal Services Authority (MSLSA)-in a lo thawh tawh leh thawh mek chu a tha hle nia a hriat thu a sawi bawk a ni.