Local/Village Level Task Force member, Covid-19 vanga thiten zangnadawmna an dawn theihna tura duan, LLTF/VLTF Covid-19 Ex Gratia Lumpsum Compensation Scheme chu September 30 thlenga hman tur a ni a, he scheme hman hun chhung hi pawtsei turin sorkarah dil mek a ni.
He scheme buaipuitu, Task Group on Insurance hotute chuan LLTF/VLTF Covid-19 Ex Gratia Lumpsum Compensation Scheme hman theih hun chhung pawtsei turin sorkarah dilna ziaka an thlen tawh thu The Zozam Times an hrilh a, hemi chungchang hi cabinet meeting-a ngaihtuah tur a ni tiin, sorkar hian an dilna hi an pawmpui an beisei tih an sawi.
Task force member, Covid-19 vanga thi, zangnadawmna dawng thei mi panga hnen atangin dilna a lut tawh a, chung zinga pahnih chu pawm niin, dilna lut dang pathum erawh document tihchian ngai a la awm avangin pawm a la ni lo.
Task Group on Insurance hotute chuan, document fel tawk lote hi document kimchang a awm hunah ngaihtuah leh a ni dawn tih an sawi a, chutihrual chuan tun thlengin document kimchang erawh an hnenah an rawn la theh lut leh lo tih an sawi.
He scheme hnuaiah hian LLTF/VLTF member, an duty-na atanga Covid-19 kai, hripui vanga thi zui an awm chuan an chhungte hnenah Rs nuai 20 pek theih a ni a; he scheme hnuaiah hian mi 26,000 chuang an inziak lut tawh a ni.