African Swine Fever (ASF) vanga vawk thite hi state-in chhiatrupna (calamity)-a a puan phawt loh chuan zangnadawmna inpek ngaihna a awm loh thu sawiin, tun dinhmunah zangnadawmna sorkarin a pek theih dawn leh dawn loh sawi theih a la nih loh thu AH&Vety minister Dr K Beichhua’n a sawi.
Nimina a pisaa thu thar thehdarhtute a kawmnaah Vety Minister Dr K Beichhua hian ASF vanga vawk chântute dinhmun leh an tawrhnate chu pawi an tihpui thu leh, ei bar zawnna kawng leh mihring rilruah pawh nasa taka nghawng a nei dawn tih an hriatpui thu sawiin, “ASF vanga vawk chantute tan zangnadawmna dapsak dan kan ngaihtuah a. Amaherawhchu, state-in chhiatrupnaa a puan phawt loh chuan zangnadawmna inpek ngaihna a awm lo a. Vawiin hian zangnadawmna kan pek theih dawn leh dawn loh hi a changtu minister ka nih angin ka la sawi thei lo,” a ti.
ASF vanga vawk thite hi chhiatrupnaa puansak turin Disaster Management & Rehabilitation (DM&R)-ah an thlen tawh thu sawiin, “Chhiatrupnaa min puansak theih chuan State Disaster Response Fund (SDRF) a\angin zangnadawmna hi pek theih turah kan inbeisei,” a ti.
October 5, 2021 khan Chief Minister Zoramthanga chairman-na hnuaiah State Disaster Management Authority \hutkhawm a nih thu sawiin, Dr K Beichhua hian, “He \hutkhawmah hian ‘tun dinhmunah SDRF sum dinhmun a tlem em avangin, ASF hi chhiatrupnaa puan ni rih lo se; mahse, chief secretary kaihhruaina hnuaiah DM&R leh Vety dept te \hutkhawm neih nise, chu chuan SDRF sum hi sorkar laipui \anpuina lo kal tura beisei belhchhah nan ngaihtuah se’ tiin a rel a,” tiin, chief secretary hova \hukhawm neih turah hian thutlukna an siam theih dawn chauh thu a sawi.
Dr K Beichhua hian ASF hri kai vawk suat (cull) chungchang pawh sawiin, sorkar laipuiah scheme awmsa a awm thu leh amah ngei pawhin Delhi-ah a bawhzui bakah SEDP Board Vice Chairman C Lalmuanpuia, MLA leh vety dept hotute dangte nen an bawhzui reng sawi a. Vawk suat te tana sorkar laipuia zangnadawmna an dilna chu a kaltluan thu leh, hemi atan hian sorkar laipuiin a tum tur hi cheng vbc 5.84 vel a nih thu sawiin, “Dilna hi zirchian a nih hnuah sorkar laipuiin file a kal tir thei dawn tih hriat a ni a. Beiseina sang tak kan nei a, hma min lakpui zel tur thu min hrilh a ni,” a ti.
Vawk suat tana zangnadawmna inpek dan tur hi a tehkhawngah chuan sorkar laipuiin zaa 50, state sorkarin zaa 50 tum tura tih ni mah se, state pachhe tan chuan tlin ngaihna a awm loh avangin 90/10-a tihsak hram tura thlenin, a hlawhtlin leh hlawhtlin loh tur erawh sawi theih a la nih loh thu a sawi bawk.
Vety Minister Dr K Beichhua sawi danin:
- ASF hmuhchhuah a nih hmain Vety dept in awareness neiin hmun hrang hrangah vawi 209 an feh chhuak
- Mizoramah ASF hi March 21, 2021-ah Lungsen ah hmu chhuak tan
- March 28, 2021 atanga nimin thlenga vawk thi zat 40600
- Ram puma ASF len hmaa vawk population hi 200000 vel nia chhut a ni
- Tuna hian vawk population hi 105000 vel nia chhut a ni
- Vawk suat tawh zawng zawng zat 10380
- ASF vanga thi zat 29696
- ASF rinhlelh vawk thi 526
- Mizoram district 11-ah ASF lut tawhin, khaw 271 ah he hri hi hmuhchhuah a ni tawh