Myanmar atanga Mizoram kaltlanga kuhva rah tawlh luh chu sorkarin ngaimawh mah se reh lam a la pan thei lo a, khawchhak atanga kuhva rah tawlh avang hian Mizoram chhunga kuhva huan nei leh eizawn nana hmangten harsatna an tawh phah.
Dan lova khawchhak atanga kuhva tawlh luh hi tihtawp a nih tur thu sorkar hotuten an lo sawi tawh a, Champhai bawrhsap-in tum hnih ngawt a enkawl district chhungah kuhva phurh a lo khap tawh a. Heti chung hian kuhva tawlh ruk hi a reh hlei thei lo.
Khawchhak atanga dan loa kuhva rah tawlh hi Mizorama kuhva hmanga eizawngten an tuar a, Mamit district chhung khawthlang lam, Hachhek bial huam chhunga kuhva chingtute intelkhawmna, Hachhek Bial Kuhva Chingtu Pawl (HBKCP) pawhin he harsatna hi tawkin, tun thla ni khat atang khan duty an indah a, chhun-zan zawmin Zamuangah Burma ram atanga kuhva phurh dang turin an duty thin.
HBKCP Chairman Lalzawna Pachuau chuan tiamchin awm lova duty an nih avangin Zamuangah kuhva rah tawlh dangin an duty reng dawn tih The Zozam Times a hrilh a, hetih lai hian Tuidam khawdai atanga Tumpanglui lama kal an awm nia hriat a nih avangin nizan atang khan helai hian duty an insiam bawk niin a sawi.
Hachhek bial hi kuhva ching nasa leh a thar chhuak nasa an ni a, kuminah erawh an kuhva tharte hralh hlei thei lovin mahajon-ten an lak vete pawh Assam thuneituten khawchhak kuhva nena inpawlhah ngaihsakin an chawitir thin a, a rate thlenga a tlakhniam thu leh kuhva lei tura vai an lo chhuah that duh loh thu HBKCP hruaitute chuan an sawi bawk.
Mamit DC-in order hran a tihchhuah lem loh avangin Kanhmunah khawchhak kuhva tawlhtute godown pawh a la awm nual niin an sawi a, bial mi leh sate ngei ngei pawh inrawlh an awm nia an hriat thu leh an kuhva thar market a tihchhiat phah avanga pawi an tih thu an sawi.
Hachhek bial chhunga pawl lian tak, Hachhek Constituency Development Committee (HCDC) pawhin kuhva chingtu pawl hmalakna an thlawp thu The Zozam Times an hrilh a, an pawl chairman, Lalvansanga Pautu chuan dan lova kuhva phurh luh awm thin chu pawi an tih thu leh, khawtual miten harsatna an tawh phah chu an en liam mai dawn loh thu leh prime minister hnen thlenga memorundum thehluh tuma an inbuatsaih thu a sawi bawk.