Nobel Peace Prize dawng naupang ber, Malala-i’n pasal nei ta!


Nobel Peace Prize dawng tawh, hmeichhe naupang lar tak thin kha tunah chuan nu a ni ta.
Malala Yousafzai-i chuan England-a Birmingham-ah Islam danin pasal a nei.
Malala-i leh a pasal, Asser Malik hian nikkah ceremony hmangin sakhaw dan angin nupa an ni ta a ni.
Kum 24 mi chuan a nuna ni duhawm ber pakhat a nih thu a sawi.
Hmeichhiate dikna chanvo humhalhna kawnga nasa taka beitu, Pakistani hi kum 2012-a Taliban-in a lua an kah hnuah dam chhuakin West Midlands-ah hian a raltlan.
“Asser nen dam chhunga awm dun turin kan intiam ta,” tiin Thawhlehni khan Twitter-ah a tar lang a. An inneih inkhawm chu chhungkaw hnih telin, tenau taka an tih thu a tar lang bawk.
“Kan pahniha kan hmalam kawng zawh kan châk tawh hle a ni,” a ti.
Malala-i hi kum 15 mi lek a nih laiin hmeichhe naupangte tana zirna kalpui a tul thu a sawi nasat avangin Pakistan-a Taliban-ten an bei.
Hmarthlang lam, Swat phaikuama an sikul bus-a a chuang chu an kap a; mahse, a dam chhuak a. A thiante pahnih pawh na takin an inhliam.
Thi leh lek atanga a dam chhuah hnuah Birmingham-ah an chhungkuain an pem a, ‘a in pahnihna’ tiin a sawi thin a. Kum 17 mi lek a nih lai khan Nobel Peace Prize dawngin a dawng thei naupang ber a ni a. Oxford University-ah lehkha zir zuiin mihring dikna chanvo humhalhna kawnga thawhhlawk ber pakhat a ni.
A graduate hnuah Malala-i hi Afghan raltlante tan nasa taka beiin Apple TV+ nen thawhhona an ziah angin an chungchang documentary an tichhuak nual a, British Vogue kawmah pawh hmeichhe naupangten zirna an dawn theih nana a beih nasat avangin a chuang tawh.
Tuna an inneihna, nikkah ceremony an tih hi dan hmaa inneihna a la tling lo va; mahse, Islam sakhaw danah tih hmasak ngai a ni.
A hranpain an chhungkuain inneihna pangngai an buatsaih leh a, inneih dan pangngai anga tih leh an tum em tih chu hriat a ni lo.
Malala-i hian tun hma lamah pasal neih hi a sawi ngai lo hle a. Vogue-in July thla maiah an kawmnaah pawh, “Mi hi engati nge an inneih mai zel tih hi ka hre thiam thei lo,” a la ti.
“I duh dan anga i nun duh chuan engvangin inneih thutiam i chham, kawppui (nupui/pasal ni lo) hi a tawk zo mai lo em ni?” a ti bawk.
“Ka nu hian hetianga sawi lo turin mi ti thin a, pasal nei ngei tur leh nupaa insiam chu a mawi thu a sawi thin,” a ti.
Social media-a an innei tih a puanna hi amah duhtu sang tam takin an like a, tam tak chuan hlim taka awm turin duhsakna an hlan.

Leave a Reply

Your email address will not be published. Required fields are marked *

error: Content is protected !!