Afghan mosque beihnaah mi pathum thi


Afghanistan khawchhak lam, Nangarhar province-a Spin Ghar-ah, Zirtawpnia Muslim tawngtai hun laiin mosque beih a ni a, mi pathum vel thiin mi dang 15-in hliam an tuar niin a bul hnaia chengte leh Taliban thuneituten an sawi.
Damdawi ina doctor chuan AFP news agency hnenah thi pathum an awm thu hi a sawi a. “Mi pathum an thi tih a chiang tawh a, mi 15-in hliam an tuar,” a ti.
Thil thleng hmutute zinga pakhat, a patea pawh beihna thlenga hliam tuar ve chuan Al Jazeera hnenah hliam tuar mi 15 vel a hmuh thu a sawi a, an zingah hian an Imam pawh a tel a, ani hi an tawngtai hruaitu ber a ni tih a sawi.
Thil puak chu mi tam awmna, mosque chhunga Imam dinna bul lawk atangin a nih thu a sawi bawk.
A hmain Nangarhar Province-a sorkar thupuangtu, Qari Hanif chuan mosque-ah hian thil puak a awm ngei thu The Associated Press news agency a hrilh.
A bul hnaia cheng, Atal Shinwari chuan a puah hun hi chhun dar 1:30 (India-a India-a chawhnu dar 2:00) pelh hnu a nih thu leh mosque chhum lama puak ngei nia a hriat thu Reuters news agency a hrilh.
Khawtlang hruaitu pakhat, Walli Mohammed chuan bomb chu loudspeaker chhunga kam nia a lan thu AFP a hrilh a. Speaker an tihnuna tawngtai tura insawmna, azan an tan chiah khan a puak ta niin a sawi.
Eng pawl mahin an tihah an la chhal lo.
August thlaa Taliban-in ro an rel leh hnuah Afghanistan-ah hian Islamic State in Khorasan Province, ISKP (ISIS-K) an tih, ISIL (ISIS) hnuaia firfiak pawl inziak lut hi an che nasa hle a, mi pawh an thi tam tawh a, an ram venhimna a derthawng hle.
November thla tir khan Kabul-a sipai damdawi in chu ISKP hian beiin mi 19 vel an thi a, mi 50 chuangin hliam an tuar.
ISKP hi Nangarhar province atanga indin niin Hazara hnamten an hman thin mosque an bei duh bik hle.
Taliban thupuangtu, Zabihullah Mujahid chuan he pawl hi an hlauhawm lem loh niin a sawi ve thung.
United Nations-in Afghanistan chu mipuiten harsatna an tawrhna nasa ber ram a ni tan mek a, mihring zahve chuangin kham khawp ei tur an nei lo tih a sawi lai mekin himna lamah pawh an derthawng.
World Health Organization thupuangtu chuan Zirtawpni khan kumin kum tawhah hian Afghan naupang maktaduai 3.2 vel chu ei tur tha hmu phak lo an ni dawn tih a sawi a, mi maktaduai khat vel nunna chu khaw vawt nen, a derthawng hle dawn bawk niin a sawi.

Leave a Reply

Your email address will not be published. Required fields are marked *

error: Content is protected !!