Hachhek Constituency Development Committee (HCDC)-in Commerce & Industries Minister Dr R Lalthangliana hnenah Myanmar atanga dan lova kuhva lakluh titawp tura ngenna ziakin an thlen.
HCDC chuan Hachhek bial mipuite eizawnna ber, kuhva chingtuten a hralh kawngah harsatna an tawk mek tih sawiin, pawi an tih thu an sawi a. He harsatna thlentu bulpui ber chu Myanmar atanga dan lova lak luh nia an hriat thu an sawi.
Hachhek Bial Kuhva Chingtu Pawl (HBKP)-in Zamuang khuaah chhun zan zawmin Assam-a Myanmar kuhva lut tur duh lohna an lantir mek tih sawiin, HCDC chuan hei hi an thlawp thu an sawi a. Khawthlang mipui kuthnathawktute innghahna ni mek, kuhva huan siama tha tam tak an lo sen tawhna leh market tha sa reng ram dang atanga dan lova Myanmar kuhva tawlhrukin harsatna a siam chu pawi an tih thu leh a rang thei ang bera Myanmar kuhva sumdawnna chu chhu chat ngam tura sorkar an ngen thu an sawi bawk.