India rama Covid-19 venna atana damdawi siam chhuah hmasak ber, Covaxin chu zirchiannaah a that tawk thu leh a him lohna sawiah hlauhthawn tur a awm lo tih damdawi lam chanchin ziahna chanchinbu, Lancet chuan a tar lang.
Covaxin hi World Health Organization (WHO) pawhin kar hmasa mai khan hman theihin a pawm a, khawvel huap pawlin vaccine a pawm pariatna a ni a. An pawm hma pawh hian ram 17 vel chuan an rama hman turin an lo pawm tawh.
A code hming, BBV152 tia an sawi thin, Covaxin hi natna hrikin taksaa hna a thawh theih lohna tura Bharat Biotech-in Indian Council of Medical Research leh National Institute of Virology nena tanghova an siam a ni.
WHO hian ram rethei leh neinung vak lote tan a dahthat a awlsam avangin hman chi tak niin a sawi.
Vaccine siam chhuah tam tak hi a dahthatna atan hmun vawt uchuak tak (very low temperatures) a ngai a, hei hian thawn vel leh a man pawh a tihto phah.
Lancet-in zirchiannaa an hmuh a tihchhuahah chuan Covaxin hi ‘puitling zinga laboratory-in COVID-19 kai natna lang chhuak a tihte tan a tangkai’ tih a tar lang.
He damdawi hmanga inchiu hian hlet tha lo dang a thlen hlauhthawnna chhan tur a awm lem lo niin an tar lang tel bawk.
India-in a siam damdawi hi thla khat dana vawi khat ve ve lak chuan hri lakah hian 78% zetin a veng thei niin WHO chuan a sawi.
COVID vaccine zingah hian Pfizer/BioNTech, Moderna, AstraZeneca, Johnson & Johnson, Sinopharm leh Sinovac ten an siamte chu WHO hian hman theih turin a lo pawm tawh a ni.
Lancet-in zirchiannaa thil hmuh a tihchhuah hi India chauhva enchhin atanga an hmuh a ni a, hnam leh khaw hmun azirin a thawh dan a dang thei niin an sawi.
Zirchianna hi November, 2020 leh January, 2021 inkar neih kha a ni a, inkai awlsam tak, Delta variant a chhuah hma kha a ni bawk.
&&&&