Central YMA Executive Committee chuan kum 2022-a electoral roll ennawn hna, Special Summary Revision neih turah khua leh tui dik tak, kum tling ngei an luh theihna tura hma la tur leh dan loa roll-a luh tumte huaisen taka dodal turin branch YMA-te an ngen.
Inrinnia CEC thukhawm chuan branch YMA-te chu electoral roll hearing neih a nih hunah YMA aiawh mi paruk aia tlem lo tel ngei turin an ngen a, a tul a nih chuan dan loa roll-a luh tumte huaisen taka dodal turin an ngen a ni.
Electoral roll-a chuang tawh, khua leh tui dik tak ni lo, roll atanga paih an duhte chu complaint theh lut ngei turin CEC hian branch YMA-te a ngen a, complaint-na form chu Designated Officer (DO)/Booth Level Officer (BLO) hnen atanga la chhuaka theh luh leh mai tur a nih thute an sawi.
CEC thukhawm chuan YMA General Conference vawi 73-na neih hun atan December 16 an ruat a, a hmun tur zirchiang turin Central YMA OB-te an ruat a; General Conference-a rorel palai leh hruaitu thlana kal thei zat turte an bithliah fel bawk.
&&&&&