Sakawrtuichhuna Tawngtai Bethel Camping Centre (TBCC)-a awm zingah Covid-19 kai an awm avangin sample endik rûnpui neih a ni a, mi 258-in hri an kai tih hriat chhuah a ni.
The Zozam Times zawhna chhangin TBCC-a an hotupa, TT Zohmingthanga chuan tun hnaiah an centre-a awm zinga pakhat chu a damsam lo a, centre atangin inentir tura chhuahtir niin hri a kai tih hriat chhuah a nih thu a sawi a, hemi avang hian an centre-ah hri inkai darhna a thleng thei a ni tih hriaiin health department hotute a hriattir a, centre-a awm zawng zawngte chu hri an kai leh kai loh endik an ni tih a sawi.
TT Zohmingthanga chuan TBCC-ah hian mi 668 an awm mek thu leh chung zinga mi 258-ten hri an kai tih hriat chhuah a nih thu a sawi a, “Hri kaite hi room paliah dah hran nghal an ni a, symptom neite pawh an awm a; mahse, ngaihtuahawm khawpa harsatna tawk erawh an awm lo,” a ti.
An centre-a awm mek zaa 40 zetin Covid-19 an kai avangin eirawngbawlna tur thing an lakkhawm kawngah harsatna an tawk a, thing an phur thei lo tih a sawi a, chutihrual chuan thil dangah erawh harsatna lian tham an tawk lo a, Pathian zarah harsatna lian tham an tawh loh zel an beisei tih a sawi.
Hri lengin a luhkhung a, harsatna an tawh chungchangah hian sorkar hotu lamin an ngaihven hle tih a sawi a, Pathianniah Saron Veng YMA-in hri kaite ei tur damdawi thahnem tak an pe a, room hrang hrangte an kah thianghlimsak tih a sawi.
TT Zohmingthanga chuan an centre hri inkai darhna a thlen chhan chu han rinzawn tur pawh an hriat loh thu a sawi a, “Centre-a rawn lut tur hian negative certificate kan lo phut thin a, hetia hri kai kan awm chhan hi rawn lut tharte han puh dawn ila, khualchhawn lamten hri an kai leh bawk si lo a, Pathian remruatah kan ngai hmiah mai,” a ti.
Mizorama Covid-19 hri leng a zual vang lai, June 25, 2021 khan TBCC-a awmte hi State Field Laboratory Unit-in kalchilhin hetihlaia centre-a awm zawng zawng, mi 602-te chu an sample an endiksak a, hemi tum hian he centre-a awm zingah hri kai hmuh chhuah an awm lo a, an negative vek a ni.