HMEICHHE HUANG
Sik leh sa, boruak inthlak danglam thut hian hrawk nâ/thip leh hritlang hi mi nawlpuiina kan hmachhawn nghal thin a ni a.
Hritlang hi pumpelh leh tlansan nghal hmak theih a nih loh laiin, a enkawl dan leh zia-awm dan mai bakah tihdam dan thlengin a awm a.
Hetiang hian i han en thuak thuak teh ang:
Tissue hmang rawh:
Hritlang a lo awm chiah hian hnap hnit aiin, kan khawl lai lawk fo thin a. Hei vang hian hnar chhungah a inhnawhtawm a, boruak lut tur a lo dang ping a, a buai chho tulh tulh thin. Hnar ping lo tura invenlawk hi a harsa lem lo. Hnar chhung hnawk hman lo tura tissue-a hruk fai thin leh, hnap hnih chhuah (na taka tih a him lo) hi a pawimawh.
In lama enkawl
Hnap tawlh leh hnap tui pur hi thil ninawm tak a ni a. Thenkhat hritlang hmâ em em an awm bawk a, chutiang mi i nih chuan, ser leh sawhthing tui chhuanso in a tha a, a hmantlak hle tih finfiah a ni tawh.
Theirah ei uar
Vitamin C tamna theirah ei fo thin hi hritlang enkawlna kawngah a thawk chak hle tih hi phat rual a ni lo. Hritlang satliah mai pawh hi pumpelh theih loh a nih laiin, theirah hrisel i ei tha a nih chuan, rei tak hritlangin a bawhbuai lovang che.
Soup tui tak in rawh
Nilenga blanket hnuaia tawm tlawt tlawt kha a ni ber lo. Thlaihnah leh thlairah awmna soup tui tak mai, ngam tawka sá deuh var mai han in hi a tha tih piah-lam a ni. Taksa tana thil pawimawh, ‘fibre’ a awm a, ekkhal tur thlengin a veng thei a ni mai lova, natna hrik do thei turin taksa khâwl leh sipaite nasa takin a tichak.
Tui in ṭeuh rawh:
‘Nitin no 8, nitin no 8’ tih hi hla thu-a awm mai tur a ni lova, taksa chhunga lakluh pawh thil tul tak a ni. Hritlan hian taksa chhunga tui mamawhna a nasa zual hle a, chuvang chuan, hunbi nei taka tui intam a pawimawh. Tui in harsa i tih pawhin, theitui hrisel tak tak a awm a, in ngei ngei ang che.
Purunvar leh sawhthing
Tukthuan emaw zanriah eina ah hian chawhmeh leh antui-ah sawhthing leh purunvar telh thin ni se. Purunvar hi ‘antibiotic’ chak tak a ni a, natna hrik te hian an ngam meuh lo. Sawhthing hian thâwkna dâwt a tleng fai thei a, hritlang pangngai beihlet nan tha rem rem tak a tling.
Hahdam rawh
Tui taka mut (darkar tam tak a ngai kher lo) hi nitina harsatna neuh neuh awm thin chinfel nan leh enkawl nan a tha em em a. Rilruhah leh hritlang enkawlna ah te pawh a hmantlak hle. Hritlan deuh reng hian taksa hi a chak lo ve tial tial thin a, chuvang chuan, hahdam taka awm a, tui taka mut hi thil tul tak a ni.
Tuilum hu
I hnar a ping a, a tawt viau chuan tuilum hu han hip vang vangte a tha a, tuiluma inbual leh towel lum (ngam táwk) a, âwm han chulh te pawh hian danglamna a thlen thei.
No smoking
Meizuk hian hrawk a tibuai khawlo vek thei tawh hrim hrim a, a chhunga awm boruak tha lo leh thil tha lo beiletna pawh a tichawlawl nghal thin. Meizuk sim hmak harsa i tih pawhin, i hritlang anih chuan zu tlem ang che.