1984 atangin Mizoramah ruih-hlo thihpui 1,688 awm tawh

Kum 1984-a Mizoramah ruihhlo vanga thi hriat hmasak ber atanga November 15, 2021 thleng khan ruihhlo hman sual avanga thi 1,688 awm tawh.
Nimin khan National Press Day pualin MJA Gen. Hqrs chuan ‘Drugs Awareness Campaign’ neiin, he hunah hian Excise & Narcotics Department Asst. Commissioner Peter Zohmingthanga chu resource person a ni.
Magnitude of Substance abuse in India zirchiannaah Mizoram hi India rama ruihhlo tih nasatna langsar ber zinga mi, Punjab dawt chiahah a awm thu sawiin, “Kan dinhmun a chhia a, Mizote hi ruihhlo laka harsatna kan tawhna hi a la rei lo chungin, min khawih buai nasa tawh a. Chuvangin, ngaihthah theih chi a ni lo,” a ti.
Mizorama ruihhlo do tak tak tur chuan Excise and Narcotic Deparment (END) thawktute, office, quarter leh sum indaih lohna avangin hma nasa taka lak a harsat thu a sawi a. Tun dinhmunah END-ah thawktu mi 559 awm mekin, heng zingah 129 chu thawktu hnawh khah loh a nih loh thu a sawi a. Tunah hian district office 10 chuang an enkawl mekin, Hnahthial, Khawzawl leh Saitual district-ah an la inzarpharh leh a tul dawn avangin indaih lohna a nasa zual dawn niin a sawi.
Mi thahnem ngai thenkhatte an thahnem ngaihna luatah misual leh ruihhlo hmanga ramchhunga hrem tul tak tak te hrem loha an awm phah fo theih thu sawiin, Peter Zohmingthanga chuan, “Social media hmangin midangte hriata phochhuah zung zung kan chak a, kan ching a, hei hian dan kenkawh leh a bawhzuitute thil chhuina a tibuai zauh zauh a ni,” a ti a. Hei vang hian dan awmsa te palzut lova ram humhim tura thiam taka tan lak theihna turin mipuite zirtirna neih a pawimawh thu a sawi.
Mizoramah hian sorkar, tlawmngai pawl leh kohhran te’n theihtawp chhuahin ruihhlo doin, supply leh demand reduction lamah tan lain drugs awareness te neih thin ni mah se, ruihhlo in bu a khuar nasat tawh thu a sawi a. Tunah phei chuan SDO leh BDO awmna hmun te hi ruihhlo ti nasa pawl an nih tawh thu a sawi a. A bik takin Kolasib tlangdung phei chu NASHA Movie Bharat programme-ah India rama district 275 vel drugs tih hluar tamna hmunah puan a nih thu leh ruihhlo ti thar an pun nasa avangin venhim a ngai zual niin a sawi a. Aizawl leh Champhai pawh ruihhlo ngai tamna pawl nia a lan thu a sawi bawk.
Peter Zohmingthanga chuan, “Ruihhlo hian min chenchilh reng dawn a. Hei vang hian kan hma zawna thil lo thleng hi a hmachhawn dan leh dawnsawn dan kan inzirtir a hun tawh a ni,” a ti.
He huna a tarlan danin, Mizoramah ruihhlo vanga thi hi nimin thleng khan mi 1688 awm tawhin, he’ng zingah mipa 1491 leh hmeichhia 197 an ni.
Drugs hman khawloh vanga thihna thleng zat zingah Dextroproproxyphene vanga thi hi mi 1161 an ni a, heroin vanga thi hi 340 niin, ruihhlo dang vanga thi hi mi 187 an tling tawh a ni.
Ruihhlo avanga thubuai awm hi kum 2019 khan mi 777 awmin, kum 2020 ah mi 438 leh kumin October 31 thleng khan mi 357 an tling tawh a. Mihring man zat hi kum 2019 khan 1053, kum 2020-ah mi 574 leh nikum October 31 thleng khan mi 493 an awm tawh bawk.

Leave a Reply

error: Content is protected !!

Notice: ob_end_flush(): failed to send buffer of zlib output compression (1) in /home/thezozam/public_html/wp-includes/functions.php on line 5427

Notice: ob_end_flush(): failed to send buffer of zlib output compression (1) in /home/thezozam/public_html/wp-includes/functions.php on line 5427