Tha taka Suu Kyi enkawlah sipaite inchhal


Myanmar-a sipai thuneitute chuan an ram hruaitu an paih thlak tak, Aung San Suu Kyi chu tha taka enkawl a nih thu BBC an hrilh.
Kum 76 mi, an ram hruaitu hlui hi February thla tirah sipaiten thuneihna chhuha an paih thlak hnuah hmuh tur a awm tawh lo.
BBC-in Myanmar sipaiten United States chanchinbumi, kum 11 lung in tang tura an hrem hnu lawka an chhuak tak, Danny Fenster-a chhuah a nih hnu lawkah sipai thupuangtu, Major General Zaw Min Tun-a kawmnaah a sawi.
Sipaiten thuneihna an chan hnuah khan chanchinbu eng emaw zat leh civil mi sang tel man an ni tawh.
Maj Gen Zaw Min Tun chuan Suu Kyi-i hi an hrenna hmunah tha taka enkawl a nih thu a sawi.
“Hemi awmzia chu a mite nen pawna chhuak thei lova hrengin inah an awm vek tihna a ni,” a ti a. “A tan kan theihtawp kan chhuah a, a ei duh zawng leh thil dang a mamawh pawh kan ngaihtuahsak zel a ni,” a ti.
Suu Kyi-i hi sipai sorkar hian British-in an ram an awp hun lai ata tawh dan an neih, official secrets law bawhchhiaa puh a ni a. Ei ru leh dan lova inbiakpawhna hmanrua (walkie-talkie) kawla puh a ni bawk.
Thawhlehni khan sorkar chanchinbu chuan puhna dang pek leh a nih thu a tar lang a. Hei hi kum 2020-a an ram inthlanpuia a kaihhruai party-in chiang taka hnehna an chan tuma inthlanna tichingpena puhna a ni.
Court-a inlantir a ni tawh a; mahse, reilo te bak amah hmuh tur leh a thawm hriat tur a awm lem lo.
UN chuan chhuah turin Myanmar sipaite chu a nawr reng.
BBC hnenah hian Maj Gen Zaw Min Tun chuan US chanchinbumi, Fenster-a pawh thuneituten rem an tih anga chhuah a ni tih a sawi bawk.
Fenster-a hi Thawhtanni khan chhuah a ni a, a hma lawkin Myanmar rama luhna dan a bawhchhiat avang leh dan lova a khawsak avang te, sipaite tichhe zawnga a chet avangtein kum 11 tang tura hrem a ni.
Heng bakah hian ram do zawng leh firfiaka chetnaah puhna a nei bawk.
Maj Gen Zaw Min Tun-a chuan Frontier Myanmar-a thawk, Fenster-a chhuah nan hian engmah dawn let an nei lo tih a sawi bawk.
Thla hmasa khan Myanmar sorkar hian sipaiten thuneihna an chan duh lohna lantirtu an man mi 5,000 chuang an chhuah tur thu an lo sawi tawh bawk.

Leave a Reply

Your email address will not be published. Required fields are marked *

error: Content is protected !!