Auto Corner
by Ruata
Mahindra XUV500 tawp ta, kum 3 hnu ah lo kir leh beisei
Mahindra XUV500 chu company lamin a siamchhuah hna an titawp ta a. Report thenkhat chuan kum 2024 bawr velah Mahindra hian an rawn tihchuah thar leh an beisei a ni.
Kan lo tarlan thin tawh ang leh India ram lirthei chanchinthar tam berin an lo puan tawh danin Mahindra XUV500 hi tuna Mahindra SUV thar XUV700 tihchhuah a nih hunah a tawp ang a, nakinah a aia te deuhin midsize SUV dangte el turin a rawn chhuak leh dawn tih a ni a. Hei hi tunah hian a lo thleng ta a, Mahindra XUV700 a lo chhuah tak hnu reiloteah XUV500 siamchhuah hna tihtawp a nih thu hi kan hmu zui leh ta a ni.
Mahindra XUV500 hi a lo kir leh hunah chuan Hyundai Creta, Kia Seltos and MG Astor tih vel ho a rawn el dawn a. Hei hi chiang zawkin Mahindra lam atangin pawhin kan hre leh vat turah beisei ila. Mahindra XUV500 hi a hma aia te hreta a lo chhuak a nih chuan SUV tawk tha tak tur a nih hmel a. Tuna an compact SUV chhuak mek XUV300 aia lian lian duh si, XUV700 lian ti bawk si tan a tawk dawn viau a, tunah pawh hian an lirthei line-up-ah hmun awl zau tak a awm dawn a tih theih awm e.
Mahindra XUV500 lo chhuah leh hun tur hi a nghahhlelhawm bakah company tan pawh XUV300 leh XUV700 inkar awl awm kul mai, market lama ti che tha thei tu a nih theih avangin a hmanhmawhthlak thei bawk a. Mahindra erawh company hlun leh rintlak an ni a, an niin hun an tih takah an rawn tichhuak mai dawn a ni.
Mahindra XUV500 hi a hma khan Mahindra SUV zinga a to ber pawl leh lian tha, mawi si, changkang bawk si a ni a. He lirthei hian duhtu tam tak a nei a. Kan state chhungah ngei pawh tam tak a awm a ni.
Mahindra chuan XUV500 aia lian hret SUV thar changkang leh a elpui zinga chak ber ni tur XUV700 chu an tichhuak ta a, hei hi book tu pawh an tam em em a, tunah hian a elpui lirtheite zingah rau rau pawh lirthei hralh kal leh mite duh a ni chho mek a ni.
Mahindra XUV700 a lo chhuah tirh khan Mahindra dealership tam tak chuan XUV500 booking hi an la duh lo nghal tawh a. He boruak inmung chho mek hi tunah chuan a thleng dik ta a, Mahindra XUV500 lei tur a awm tawh dawn lo rih a, a aia changkang leh mawi zawkin kan hmuh leh thuai beisei ila a tha awm e.
A tharah eng nge kan hmuh ang?
Mahindra XUV500, a codenamed atana S301 an hman hi a thar a lo chhuah hunah chuan tuna XUV300 chhuak mek platform nghahchhan si hian a ai lian hret an duan beisei a ni a. A hma khan Ford SUV nghahchhanin leh an B772 platform tawmin duan tura rinna a lian hle tawh a. Ford leh Mahindra thawhdunna a tawp tak siah chuan Mahindra hian a tharin ruahmanna an siam leh a ngai dawn a, eng angin nge ruahmanna an siam dawn tih hi puanzar a la awm lemlo a ni. Hetihrual hian he SUV thar tur hi a design tu atan Pratap Bose kaihhruai Mahindra Automotive Design Europe (M.A.D.E) team an hman hmel a ni.
A khawl lamah hian Mahindra XUV500 5-seater model hian XUV300 in a hman mek 1.5L diesel khawl, tlema khawih danglam a hman hmel niin report thenkhat chuan an tarlang a. He SUV thar tur hian BS6 aia tar leh tawh, BS6 phase II emission norms, kum 2023 atanga zawm tura beisei chu a rawn zawm tawh dawn bawk a ni. A khawl hman tura beisei pakhat 1.5L turbocharged mStallion petrol chuan 160bhp power vel lai a pekchhuah theih beisei a ni a. He SUV hi a thar a lo chhuah hunah chuan a sei zawng hi metre 4.2 emaw 4.3 bawr vel a nih beisei a ni bawk.
A man chungchangah chuan Rs.Nuai 10 chho atangin a intan hmel a, Rs. Nuai 17 man vel thlengin a awm dawn a. He SUV thar tur chanchin kimchang leh official-a company in dik lehzual leh famkim lehzuala an puan hun hi te hi a la awm leh dawn a, i han nghak rih phawt mai teh ang.