National Press Day-ah?I&PR minister-in chanchinbumite fuih


I&PR Minister Lalruatkima chuan thuthar thehdarhtute chu mipui beng an nih tih inhre nawn tur leh, taima tak leh dikna nena hna thawk a, sakhua leh political party bakah pawl hrang hrang tan bik nei lova lai taka mipuiin thudik an hriatna turin ke an pen zel a pawimawh thu a sawi.
Aizawl Press Club-a nimina ‘National Press Day’ hun hmanah I&PR Minister Lalruatkima hi khuallian niin thu a sawi a. Journalism hi inkaihhruaina tha tak neia kalpui a, mumal taka din chhoh leh hna zahawm tak a nih thu sawiin, journalism inkaihhruaina te leh mawhphurhna te vawng nung a, humhim zel turin leh chanchinbua thu chhuahte pawh a dik tawk em tih enfiah turin a chah.
Lalruatkima hian, Journalist te chu political party leh sakhua bakah pawl hrang hrang tan bik nei lo a thu lai la tur leh, thudik tan tlata huaisen taka thu ziak thin tur an nih laiin, mipui hriat tur chin hriaa journsliat ethic erawh vawn nun reng a pawimawh thu a sawi a. “Press hi hman thiam chuan ram pawhin hma a sawn a, sorkar hmalakna leh vantlang nun kawngah pawh thapui thawhtu an ni a, mipui zirtirtu pawh an ni. Chuvangin, buaina leh harsatna nasa tak sorkar leh mipuiah pawh thuziak avangin a awm theih avangin, fimkhur taka kal a pawimawh awm e,” a ti.
Journalist tan sorkar a din reng thu leh chumi atan chuan sorkar hmalakna leh policy pawh thahnemngai taka puanzar zel hi an mawhphurhna leh tih tur a nih thu Lalruatkima hian a sawi a. “Journalist-te hian sorkar hmalakna pawh a dik em tia vengtu leh khalh ngiltu a ni,” a ti a, press mite zalenna hman sual palh chu thil pawi tak a nih avangin hmasawnna atan media zalenna hman thiam a tul thu a sawi.
I&PR minister hian journalist pension scheme chungchangah sorkarin theihtawp a chhuahin study group te inruatin bawhzui mek a nih thu a sawi a. Chutih laiin, Covid-19 leng karah harsatna leh buaina an tawh thu sawiin, chanchinbumite tana hamthatna turin study group-in state dangte kalphung zirchianna nei turin kar liamta khan an tirh liam chiah thu a sawi a. “An zir rei lo turah ngai ila, an rawn zirchian veleh hmahmawh pawh a tulin ka hria,” a ti.
Press enclave chungchang pawh sawiin I&PR minister hian an bawhzui zel thu a sawi a. “Covid-19 lengin harsatna a thlen avangin kan tum ram kan la thleng thei lo a. Kan la hlawhchham chu kan la ti lo a, hmalakna chu a la kal ve reng a ni,” a ti bawk.
Social media thang chak tak karaha a khawihtu tlangpui chu thudik leh journalist ethic hre miah lo te an nih avangin, hei hian a chhe zawngin leh a tha zawngin mi a hruai thei niin a sawi a. Hei vang hian print leh electronic media te hi mipuiin a beisei dan lan chhuah tir zel a, journalist mawhphurhna vawng nung zel tura inbuatsaih a tul thu a sawi a ni.
He hunah hian MJA President hlui leh ex-officio Vanlalrema Vantawl chuan ‘National Press Day’ chungchang sawi hawngin, thuthar thehdarhtute ethics leh an zalenna humhim turin kum 1956 khan The Press Commission hmasa ber din a nih thu te, media mite hnathawh vil tur leh an thlavang hauh turin The Press Council of India chu November 16, 1966 khan din niin, a din cham hriatreng nan National Press Day hi kum tin November ni 16 ah hman thin a nih thu te a sawi.
Vanlalrema Vantawl chuan, thuthar thehdarhtute chu mi hnuaihnung zawkte thlavang hauh turte, aw nei pha ve lote tana awrawl chhuah turtea beisei an nih angin kumin National Press Day ah pawh hian ruihhlo chungchangah kan ram leh ngawlveite dinhmun inhrilhhriatna hman nise tih a nih thu a sawi bawk.
National Press Day lawmna hun MJA Gen. Hqrs. President Zonunsanga Khiangte in kaihhruaiin, MJA Gen. Secy Zohmingmawia’n report a pe a. National Press Day pualin ‘Drugs Awareness Campaign’ neih nghal a ni a, he hunah hian Peter Zohmingthanga, Asst. Commissioner, Excise & Narcotics Department chu Resource Person niin hun a hmanpui a ni.

Leave a Reply

Your email address will not be published. Required fields are marked *

error: Content is protected !!