State Health Care Scheme Corpus Fund-a sum awmte a pung chauh hman theih

Mizoram State Health Care Society (MSHCS) hotuten State Health Care Scheme Corpus fund-a sum awm chu a pung chauh hman theih a nih thu an sawi.
MSHCS hotute hian nimin khan chanchinbumite an kawm a, Principal Chief Executive Officer Dr Chawngthanchhunga chuan State Health Care Scheme chu kum 2008 April atanga kalpui tan a nih thu a sawi a, an din tirhah Corpus fund-ah Rs vaibelchhe 50 dah a ni a, a hnuah Asian Development Bank (ADB)-ah loan puk a ni tih sawiin, “Tunah hian Rs Nuai 20,000 a awm a, loan kan lakna bank nena inremna kan siam angin a pung chauh an pek chhuah hman theih a ni,” a ti.
Dr Chawngthanchhunga chuan MSHCS Corpus fund-a sum awm, a pung pek chhuah chu Finance department kut a nih thu a sawi a, “Finance lam hian thla thum danah sum hi min rawn pe a, tum khatah Rs vaibelchhe thum emaw, li emaw te min pe a, kum khatah Rs vaibelchhe 15 emaw 16 emaw te min pe thei thin,” tiin a sawi.
MSHCS Principal CEO chuan tuna sorkarna fawng chelh mektute hian kum 2019 khan Corpus fund-ah hian Rs vaibelchhe 50 an dah leh tiin, “MNF sorkarin an sorkar hmasaka Rs vaibelchhe 50 an dah leh tuna vaibelchhe 50 an dah lehte pawh hi a chi tur a ni a, he an sum dah atanga a pung hi hman tur a ni,” a ti.
State dangin an neih ve loh, MSHCS chu mipuiin an hlut a, he scheme hnuaiah hian inziak lut an pung zel tih a sawi a, hemi avang hian Corpus fund-a sum pung hian bill an pek chhuah tur a daih seng tawh lo tih leh chief minister hmalaknain Corpus Fund-ah Rs vaibelchhe 1,000 dah turin hmalak mek a nih thu a sawi.
Dr Chawngthanchhunga chuan, “Corpus fund-a Rs vaibelchhe 1,000 dah belh tur hi khawi atangin nge an puk dawn tih chu kan hre lo a; mahse, hei hi a hlawhtling a nih chuan kum tin Rs vaibelchhe 100 chuang a pung a awm thei dawn a, chutih hunah chuan health care scheme hi baihvai takin kan awm tawh lo ang,” a ti.
State Health Care Scheme chu kum 2009-2010 khan sum buai avang leh sorkar inthlak avangin chawlh lailawk a ni tih sawiin, kum 2010 September-ah Central Scheme RSBY kalpui a ngaih takah chuan chumi nen chuan kalpui kawp leh a ni tiin, RSBY kha October atanga kalpui tan a nih angin State Health Care Scheme pawh hi October atangin kalpui a nih thu a sawi.
MSHCS Principal CEO chuan Finance department lamin sum an pek dan chu sorkar kum chhiar dan ang a nih avangin State Health Care Scheme kum chhiar dan pawh thlak danglam a, sorkar kum chhiar mil leh central scheme ABPM -JAY zulzuia kalpui turin MSHCS Governing body-in thutlukna a siam a, thla ruk chhung pawh sei nise an tih thu a sawi bawk.

Leave a Reply

error: Content is protected !!

Notice: ob_end_flush(): failed to send buffer of zlib output compression (1) in /home/thezozam/public_html/wp-includes/functions.php on line 5427

Notice: ob_end_flush(): failed to send buffer of zlib output compression (1) in /home/thezozam/public_html/wp-includes/functions.php on line 5427