Uganda khawpuia bomb pahnih puakah mi paruk thi


Uganda khawpui, Kampala lailiah Thawhlehni khan bomb pahnih a puak a, mi paruk vek thiin mi dang eng emaw zatin hliam an tuar bawk tih thuneituten an sawi.
Bomb pakhat zawk hi parliament bul maia puak niin pakhat hi khawpui police headquarters bulah a ni bawk.
Thil thleng hmutute chuan a bul hnai chu a chhe nasa hle a, lirthei a kang a, tukverhte pawh a keh nasa tih an sawi a. Khawpui chhung hmun dangah bomb dang pawh hmuh a nih thu thuneitute chuan an sawi bawk.
Bomb puah chhan hi hriat mai theih ala ni lo.
Ugandan thuneitute chuan tun hma lama bomb puakte chu Islamist helho tihah an puh thin.
Ugandan sipaite hi African Union peacekeeping force-ah telin Somalia-a firfiak pawl hlauhawm tak, al-Qaeda nen pawha inzawmna nei, al-Shabab beitu zingah an tel.
Thla hmasaa Kampala-a bar pakhat beihna kha Islamic State firfiak pawl chuan an tihah an chhal a, kum 20 mi waitress a thi.
Thawhlehnia bomb puak avang hian parliament-a rorel inkhawm chu tihtawp niin MP-te pawh building hnaiha kal rih lo tura tih an ni.
Parliament bula car hunte chu a kang nasa hle a, police station bula puak erawh chuan tukverh vel a tichhe nasa hle.
Counter-terrorism officer-te chuan khawpui hmun danga bomb kamte an dap mek zel tih Uganda-a National Emergency Coordination & Operations Centre chuan a sawi.
Bomb dang pathum hmuh tawh zinga pahnih chu court bulah a ni tih a sawi bawk.
Police officer Edward Ochom chuan, “He thil hi inbeihna a ni chiang a; mahse, a titute erawh chhun zui mek a ni,” tiin AFP news agency a hrilh.

Leave a Reply

Your email address will not be published. Required fields are marked *

error: Content is protected !!