Kashmir-a mi pali thahah civil mi tel, an chhungten ruang phut


Venhim hna thawktuten India-in a awp chin Kashmir-ah hel pawla tel nia hriat mi pahnih leh an thawhpui mi dang pahnih an thah thu an puan tuk lawkah, an zinga pathum chhungte chuan ‘pawisawi lo civil mi thahna’ tia sawiin an ruang hmuh ngei an phut.
Police chuan Srinagar, Hyderpora venga shopping centre-ah hel an awm tih thu an dawn bawhzuia Thawhtanni tlaia an chet chhuahnaah heng mite hi an that tih an sawi.
Darkar khat chuang inkahnaah hian police chuan hel pawla tel nia hriat mi pahnih leh mi dang pahnih, shopping centre neitu kum 48 mi, sumdawng, Altaf Ahmad Bhat leh kum 40 mi, dental surgeon Mudasir Gul an thih thu an puang.
Vijay Kumar, inspector general of police chuan Thawhlehnia thuthar lakhawmtute a kawmnaah an pahnih hian helho tawmna pindan kawhhmuh tura an tiha a kawngka an kik chuan an chhang duh lo niin a sawi.
“An kik nawn lehah helho hian kawngka lo hawngin pistol-in an lo kap zui a, kan mite poawhin invenna silai an hmet puak,” tiin Kumar chuan a sawi a. Hel nia sawite hi tual chhung mi, Amir Magray leh tunge a nih an hriat loh, Pakistani mi a nih thu a sawi.
Kumar chuan Bhat-a hian shopping centre-ah hian cement dawr neiin pindan pathum chu Gul-a a luahtir bawk niin a sawi.
“Gul-a hian sorkar hriatpui loh call centre a nei bawk a, mi firfiakte thawhpuitu a ni a. Bhat-a in pawh helhovin tawm nan an hmang fo bawk,” a ti.
An chhungte erawh chuan mi pathum hi police sawi ang an nih loh thu leh inphenna atan an hmang zawk niin an sawi.
Thil thleng hmutu pakhat chuan police hian Gul-a leh Bhat-a hi sipaite hian inphenna atan an hmang nei niin a sawi.
“Min dinkhawmtir a, kan mobile phone an la a. Bhat-a hi vawi thum an hruai hrang a, vawi hnih lo kirin vawi khat a lo kir ta lo va; Gul-a pawh chutiang bawk chu a ni a, silai ri pawh kan hria a ni,” a ti.

Leave a Reply

Your email address will not be published. Required fields are marked *

error: Content is protected !!