Argentina in 2022 World Cup finals khel tura tlin nan an mamawh result an nei a. Brazil nen goal inpe lova inhnehtawkin Qatar pan turin an tling chiang tawh.
San Juan del Bicentenario-ah Copa America champion lai hian Brazil hi mikhualin an mikhualte hnung hi an zui a, South America atangin an pahnihin World Cup atan an tling chiang tawh. Inkhel dangah Chile leh Uruguay te an tlawm avangin Argentina dinhmun a chiang.
La Albiceleste hi kum hnih chhung an tlawm tawh lova, match 27 chhung tlawm result nei lovin an kal mek.
Brazil nena an inkhel hi tum dangte ang thovin boruak a sang hle a. Minute 90 chhungin foul vawi 41 ham a ni a, yellow card vawi sarih phawrh niin Argentina defender Nicolas Otamendi chuan Raphinha a nghawk luih vangin hnawhchhuah a ni lo chu a vannei hle.
Paris St-Germain striker Lionel Messi chuan October thla a inhliam avanga a chawlh hahdam hnua inkhel puitling a khelh leh hmasak berah save vawi hnih Liverpool goalkeeper Alisson chu a siamtir a. Lehlamah Brazil tan Manchester United midfielder Fred-a’n goal bar a pet per chu an goal khung teuh ber a ni.
Argentina coach Lionel Scaloni chuan kuminah Copa America an chawi ruala World Cup atana an tling thei chu an tan kum tha a nih thu a sawi a. “Copa leh tlawm lova World Cup tlin hi duhthusam a ni. Ram tha tak tak karah hetianga hma taka kan tling thei hi thil chhuanawm tak a ni.” tiin an team a fak.
Ram pahnihte hi tuten nge zui dawn tih zawhna a lian bawk a. Tling nghal tur hmun pahnih la awm zinga pakhat chang turin Ecuador dinhmun a tha mek a, palina erawh khelh li a la awm avangin ram parukin an la inchuh mek.