US rapper lar chak tak Young Dolph chu nimin khan Memphis-ah kahhlum a ni.
Helai bial vela boruak duhawm lo leh phubalakna a thlen palh hlauhthawn thil thu-ah thuneitute chuan a tul tawpkhawk lovah chuan In chhuahsan lo turin ngenna an siam hial a, a nghawng leh vuaklet na tak a thlen palh an hlau hle.
Kum 36 mi hi a chenna Memphis-a sweet dawr pakhata kahhlum niin, 2016 kuma debut album hmanga rimawi khawvel barakhaih-tu hian suntu a ngah hle.
Hmelthar ni mah se, YouTube lamah a video siam te chu maktaduai tam takin an en a, larna leh hmingthannain a umzui mek laia kum naupangtea mi kut tura a thi ta mai hian fan te a hrilhhai hle.
Memphis Mayor Jim Strickland chuan, “Rapper naupang leh duhawm tak Young Dolph chunga thil thleng hian tharum thawhnain a ken tel tawrhna nasa tak, rapthlak bawk si a pholang chiang hle,” a ti.
Uitu ngah hle
Megan Thee Stallion leh Chance The Rapper te pawhin sunna thu lungkuai zet an hnutchhiah ve bawk a, US-a mi challang tak takte pawh an bang bik lo.
Megan Thee Stallion chuan Young Dolph hi a thiantha leh ‘legend dik tak’ a nih thu uar takin a sawi a, nikum 2020 khan hla an siamdun nghe nghe.