Thuneituten kum zabi dana vawi khat thleng thin ang hiala an sawi, ruah sur nasa takin Vancouver, Canada a nuai a, kawngpui leh relkawng a tichhe nasa hle.
Tui lian nasa takin West Coast khawpui panna kawngpui lian pahnih a tihchhiat avangin khar rih a ni.
Thawhtannia thil thleng avang hian mi sang telin an chenna in chhuahsanin hmun him dang an pan.
Kawngpuia lei min vangin hmeichhe pakhat a thi a, mi dang pahnih vel chin hriat lohvin an awm mek bawk niin chhanchhuah hna thawktute chuan an sawi.
Royal Canadian Mounted Police (RCMP) chuan hmeichhe ruang hi Vancouver atanga km 250 chuanga hla, Lillooet bulah an hmuh thu an sawi.
RCMP Sgt Janelle Shoihet chuan lei minah hian lirthei ang zat chiah nge chân a nih an la hre thei lo tih a sawi niin AFP news agency chuan a tar lang bawk.
Lirthei khalhtu pakhat, Kathie Rennie chuan CBC News hnenah Lillooet chhim lam kawngpuia lirthei an tlan zut zut laiin lei min a hi thlen thu a sawi.
“Kan lirtheiah kan let a, kan hma lama mite chu te teng tung chungin an tlanchhia,” a ti a. “An hmelah tsunami a lo thleng tih hmuh theih a ni a, ka thil hmuh tawhah chuan a la rapthlak ber a ni,” a ti.
“Ka inher a, a tlang pum mai chu a lo tawlh thla a, heng lirthei zozai hi a chhilh ta a, a vai maiin a tawlh liam a, a rapthlak hle,” a ti bawk.
Provincial minister of transportation, Rob Fleming chuan kum zabi khat chhunga khaw awm dan rapthlak ber a nih thu thuthar lakhawmtute a kawmnaah a sawi.
British Columbia province-ah hian thla khata ruah an dawn ang zat zet darkar 24 chhunga an dawn avang hian luite chu a kuang atangin an luang liam nasa hle.
Vancouver atanga chhimchhak mel 120 vela hla, Merritt-a cheng zawng zawng mi, 7,000 vel chu Thawhtanni khan chhuak vek tura tih an ni.
He khuaah hian Thawhlehni khan vur a tla zui a, lirtheite chu vur khawn karah tuiin a luanpui dul dul a ni.
Helicopter crew-te chu tlangram khua, Agassiz-a mi tang mi 300 chuang chhanchhuak tura tirh an ni bawk.
Thawhtanni atanga ruah leh thli thawk hi Thawhlehni chawhnu atang kha chuan reh tawh mah se khaw tam tak tlawhpawh theih loh an la ni.
Ram chhung hmun dang atanga Vancouver kalpawhna ber pakhat, Trans-Canada Highway chu hmun thenkhatah tuiin a chim avangin a zawh theih rih loh.
Coquihalla Highway an tih, Vancouver province laili panna pawh hmun tam takah tuiin a chim bawk.
Prime Minister Justin Trudeau chuan Ottawa-a thuthar lakhawmtute a kawmnaah thil thleng a ngaihven reng tih a sawi a. “A theih ang angin kan pui zel ang,” a ti.
Tun dinhmuna khawmual atanga Vancouver kalna awm chhun chu thenawm ram, United States-a luh phawta Canada-a kual let leh a ni. US dai hnua Canada lut leh tur erawh chuan coronavirus kai leh kai loh enfiaha kai lo tih chian phawt a ngai a. US-a Washington state-ah pawh ruah a sur ve tho bawk.
Vancouver lawngchawlh hmun hi Canada-a a lian ber niin tui lian leh lei min avangin rel dintir vek niin ei tur, tuialhthei leh bungraw dang phurh theih rih loh a ni.
He lawngchawlhnaah hian ni tin bungrua $ maktaduai 440 vel phur lut leh chhuak an awm ziah niin Reuters news agency chuan a tar lang a. Tuialhthei inpekna pipeline pawh venthawn thilah tihthih rih a ni.
Ruah tam tak a sur hma lawk hian British Columbia province chuan khaw lum uchuak tak a lo tuar tawh a, mi 500 chuang an thi a, ram nasa takin a kang bawk.
Tun thla tir khan British Columbia hmun thenkhat hi tornado-in a nuai bawk a, hei pawh hi kum 50 hnua a vawi khatna a ni.