YMA-in Myanmar raltlante tlawh ve turin larsap an ngen


CYMA hruaitu ten central sorkar atanga Myanmar raltlante tanpuina leh chhawmdawlna emaw raltlante ngaihsakna emaw a awm lo pawi an tih thu Hari Babu Kambhampati hnenah an thlen a. Mizoram larsap chu hemi kawnga theihtawpa hma la tura ngenin, raltlante dinhmun hrechiang tura raltlante pawh tlawh ve turin an ngen.
Mizoram larsap chuan nimin khan CYMA hruaitute chu Raj Bhavan-ah lengah sawmin, YMA kalphung leh ram tana an rawngbawlna chungchangte a sawipui a. CYMA hruaitute chuan Mizoram leh hnam tana YMA hmalakna hrang hrangte larsap hi an hrilh a ni.
CYMA hruaitute chuan India danpui 8th schedule-ah Mizo tawng dah a nih ve theihna tura YMA-in hma a lo lak tawh dante an hrilh a. A hlawhtlin theihna tura theihtawp chhuahpui turin an ngen.
Hmarchhak kilkhawra awm, Mizoram chu central sorkarin a ngaihsak tawk lova an hriat thu leh union minister-te pawhin an tlawh tam lova an hriat thu CYMA hruaitute chuan larsap chu an hrilh a. Tun aia nasa zawka central sorkarin Mizoram ngaihsak tura hma la turin an ngen bawk.
Larsap chuan Mizoram leh hnam tana YMA hnathawh, lehkhawtlang tana an rawngbawlna hrang hrangte a lo hriat ve thu leh lawmawm a tih thu CYMA hruaitute chu lo hrilhin, YMA hruaituten a hnenah an thu thlente pawh a theih anga lo bawhzuipui a tum thu a lo hrilh bawk a ni.

Leave a Reply

Your email address will not be published. Required fields are marked *

error: Content is protected !!