AWMDAN MAWI LEH THA – 12

  • Nawlchunga Chinjah

Kan biak Pathian, Lal Isua khi a lo kal thut a, kan khawvel hi a tawp thutte a nih ngawt loh chuan, leilungah hian midangte nen kan la cheng zain, kan la inthenawm kual reng hian a rinawm a, midang kan mamawhna leh mitena min mamawhna hian tawp chin a neiin a rinawm loh bawk a, midang tel lova khawsa thei leh nung thei kan awm ngaiin a rinawmloh bawk. Kan mizo thufing, Lungpui pawh lungtein a kamki loh chuan a ding thei lo, tih hi thu dik kumkhua a ni reng ang.
Eng ang pawn awmthei leh khawsa theiin, duh zawng leh awh zawng apiang lei thei dinhmunah pawh dingin, sum leh paiah buaina neilo pawh ni ila midang kan mamawhna hi a nep ngai dawn chuang lova, midang tel lovin kan khawsa thei ngai dawn lo a ni tih hi leilung dan tih danglam theih rualloh ang maia thudik leh chiang a ni a, tumah ka mamawh lo, midang tello pawn ka awm thei, ka khawsa thei tia sawi thei leh ti thei hi, a rethei ber atanga a hausa ber Elon Musk leh Bill Gates-a te thleng hian an awm lova, innghengtawn leh inringtawn vek, a tu amah hi mahni chauhva nung tur leh khawsa tura inlahrang thei leh indah hrang thei kan awm lo mai- midang lak atang.
Chutiang ang a, mahni chauha awm thei leh khawsa theilo kumkhua tur kan nih avang chuan, midangte nena kan chenhona, kan khawsakhona, kan inthenawm kual hona, thil kan tihhona, hna kan thawhhona, hma kan lak hona thilahte reng reng hian awmdan mawi leh tha kan lanchhuah tir hi, thil pawimawh tak leh kan tih makmawh tur a ni fo dawn a, chutiang a nih avang chuan, abik takin, vawiinah hi chuan, kan ni tin nuna kan vawn reng tur atan leh kan nunpui tur atana duhawm tak te an nih tlat avangin, midang sawi leh ziah kan hriat angte chu dah tha rihin, John Wesley-a’na awmdan mawi leh tha -12 a sawite i han sawi dawn teh ang. Kan vawn reng theih a, kan nunpui thei a nih ngat chuan nang leh kei hi nun duhawm zawk leh tha zawk neitu kan ni thei ngei ang tih hi ka ring tlat a, ka beisei tlat bawk.
John Wesley-a’na awmdan mawi leh tha point sawmpahnih a sawite chu eng te nge an nih i han en dawn teh ang. Kan sawi zau belh vak lovang. Achhan chu, kan sawi zauna lamah kan chhuah ho vek palh ang tih a hlauhawm. Nangman i duh ang angin ilo sawi zau mai dawn a nia.
I rawngbawl hna ngai pawimawh la, inthlahdah suh la, thil tul lovah i hun khawhral suh.
I thusawiin eng ang mi nge i nih tih a tilang tih hre reng la, i tawng leh thusawiah fimkhur rawh.
Hmeichhia emaw mipa emaw pawh ni se i kawm danah fimkhur rawh, an rinhlelh theih tur zawngin awm tum suh.
Pathian rawna tawngtai chungin damchhunga i kawppui tur dil thin rawh.
Mi an chanchin thalo lai sawi ching lo la, i sawi a nih pawhin ama hnenah chauh sawi thin ang che.
Mi an that lohna i hriat i pawn, midang hnena sawi mai lovin, hmangaih takin anmahni hrilh zawk thin rawh.
Mi an that lohna i finfiah hma chu, midangte thusawi awi suh la, an thatlohna lam ai chuan an that zawkna lam ngaihtuah fo bawk rawh.
Miten thil an tihsak che phut suh la, mite tana thil tha titu nih tum zawk thin rawh.
I thusawi leh thil tih zahpui suh la, hna hnuaihnung leh tlawm zawk nia lang pawh thawh hreh ngai suh.
Hun vawng dikin, tlai ching lo la, midang entawn tlak khawpa hun vawn dik tum fo rawh.
Thlaraubote chhandam hi i hna pui ber ni se, chu hna chu mitin hnenah thawh tum tlat thin ang che.
Rawngbawlpui, hna thawhpuite tan thawhpui nuam nih tum la, hruaitu, hotute thu awi mi nih tum la, lungawi takin thawk thin ang che.
John Wesley-a’na awmdan mawi leh tha nia a sawite khi abik takin keini ringtu tana thil pawimawh tak a ni a, chutah pawh keini thalaite tan hian a pawimawh lehzual niin alang.
Midangte chhiatna lai tuipui viaute, tute emaw an chhiatna lai sawi a, kher ngat ngat te, hna thawhpui leh rawngbawlpuite milh lo leh thawhpui thei miah lote, midang chunga that chhuah tum hauh si lo, mite erawh kan chunga tha viau tura beisei leh phut tlatte, thil engmah hrechiang hmasa lova, hriat ang ang awi a, ring nghal tawp zel mai te, mahni hna thawh leh thil tih zahpui tlat mite hi mihringah hian a lo awm theih viau mai a, chutiang ang mi ni lo tura kan inbuatsaih leh tan kan lak a tul tak zet mai.
Khing a thusawi zawng zawngah khian insiamthatna tur ka nei vek mai, a zahthlak mang e. Keima tan liau liau a lo sawi emaw tih mai tur a ni. Nang pawn insiamthatna tur leh sima bansan tur i nei ve nualin ka ring a, ilo nei ta lo a, ilo nunpui thin thilte an nih chuan thil lawmawm tak a ni ang a, chuti a nih loh chuan, theihnghilh lova vawn reng theih tum la, a pawimawh ber mai a taka nunpuitu nih tum tlat ang che. Tichuan, i nun in mite nunah thu a sawi mai dawn hi a lo nia.
A bikin, keini thangthar, tuna nula tlangval la ni mek te leh rawllai nun hmang mekte hian awmdan mawi leh tha kan zir a, kan nunpui hi a tul tak zet a, mizo nun zemawi tlawmngaihna leh aia upa zahnate hi kan theihnghilh lova a chhawmnungtu leh a tinungtu, a taka nunpuitu kan nih a tul tak zet. Keinin, vawiinah hian awmdan mawi leh tha kan nun pui lohva, tlawmngaihna leh aia upa zahnate hi kan nun pui lo a nih ngat chuan, thangthar lo awm leh turte nun dan tur chu ngaihtuahawm tak a nih a rinawm.
Kan nungchang leh khawsak danin keimahni ni mai ni lovin kan chhungkua, kan khawtlang, kan kohhran, kan telna pawl (NGO’s), kan ram leh hnam a mualpho thei a, a hmingchhe thei a ni tih hi hre reng ila, mawi takin, a tha thei ang ber leh a duhawm thei ang berin kan nun hi hman i tum tlat ang u- thalaite hian.

Leave a Reply

Your email address will not be published. Required fields are marked *

error: Content is protected !!