Indian National Congress chuan Inrinni hian ram pumah ‘Kisan Vijay Diwas’ an huaihawt dawn a, hei hi ‘lo neituten sorkar laipuiin thutlukna dik lo tak siam bei leta hnehna an chan’ lantirna tur a ni.
Narendra Modi-a kaihhruai sorkarin lo neihna lam khawih dan sawi hlawh pathum, nikuma a pass tak, lo neituten kum khat chuang duh lohna an lantir hnua a hlip leh dawn tih a puan hnu lawkah eptu party hian a puang a ni.
Congress-in thuchhuah an siamah chuan farm law hnuh kir an lawm dawn a, state tina an unit-te chu Kisan Vijay rally huaihawta political programme hmang vek turin an ti.
All India Congress Committee (AICC) General Secretary (Organisation) KC Venugopal chuan state unit, district leh block tinte chu rally huaihawta bati chhia kawng zawh turin a hriattir a ni.
An party state unit chief-te hnena lehkha a thawnah Venugopal chuan dan ‘nunrawng tak’ farm law pathum hnuh kir a ni ta chu lo neitute tana hnehna leh kum khat chuang Congress party leh Rahul Gandhi kaihhruaina pawh tela duh lohna an lantirna rah a nih thu a tar lang.
Congress hruaitute hian dan thar duh lohna lantir a nih chhunga lo neitu thi mi 700 chuang chhungte an tlawh dawn a, anmahni hriat reng nan bati chhiin kawng an zawh bawk ang.
“Ram pumah lo neituten hnehna an chan hi liantham taka huaihawt tur a ni,” tiin Venugopal chuan a sawi a. “Lo neituten harsatna an tawhte sutlanga hnehna an chan hi kan chenna theuhvah kan tilang dawn a ni,” a ti.
“A huhova hnehna chan hi kan ram tana beitute hnehna chan pawh a ni,” a ti bawk.