Mizoram Football Association Executive Committee chuan nakkum lamah ram chhunga hripui leng a ziaawm chuan football leh futsal inelna kalpui leh turin ruahmanna a siam.
MFA Special General Body Meeting-in a phalsak angin football inelna kalpui theih dan MFA chuan a ngaihtuah a, Covid-19 hri lêng a ziaawm chho a nih chuan kum 2022-ah Under 15 League, Mizoram Premier League Under 18, MFA Women’s League, Veteran football-te kalpui turin ruahmanna a siam.
Futsal inelna pawh kum 2022 atanga kalpui theih tura rel a ni a, kumin December atangin registration an kalpui ang.
Hetihlai hian Mizoram Premier League kalpui dan turah erawh MPL Club hruaitute leh sponsor-te nen inhmuhkhawma boruak thlir chunga rel turin dah a ni.
Grassroots football training chu sorkarin naupang sikul kal pawh a la remtih loh avang leh, hripui avanga inven a la tul avangin a kalpui theih hun tur Grassroots & Youth Development Committee kutah dah a ni.
Coaching lawmman
Association of Mizoram Licensed Football Coaches-in MFA hnêna an ngenna, state football team enkawltute lawmman pun an dilna chu MFA Executive Committee chuan ngaihtuahin coach-te license neih dan azirin an lawmman tur bithliah a nih bakah, national competition-a semi final thleng chin tán an thlen san dan azirin lawmman siamsak an ni dawn.
C License Course
Kumin December chhung hian C License Coaching Course buatsaih turin MFA chuan All India Football Federation hnenah dilna a thehlut a, hei hi AIFF lamin pawmin MFA in kumin chhungin a buatsaih dawn.
District inelna
MFA Special General Body Meeting rel angin Inter District football inelnaa a thlengtu lawmman tihpun tur zat a bithliah fel tawh a. Hripui lêng a ziaawm chuan kum 2022-ah MFA Cup, Inter District Boys Championship leh Inter District Women’s Championship-te kalpui tura ruahman a ni.