EDITORIAL 22/11/21


Kuhva ro hmanga sumdawnna tihtawp a va hun tawh em

Myanmar ram atanga dan lova kuhva ro lo lutin harsatna min siam chho zel a, Assam lama tawlh thlak a nih miau avangin, kan kuhva tharchhuah min laksaktu Assam lam Mahajon tam takin harsatna an tawh phah bawk nen, kan buaina hian reh lam a pan maiin a rinawm loh.
Hetiang kan nih lai hian kan sorkar hotu lam an la ngawi a, hre zawkte sawi dan phei chuan he kuhva ro tawlhah hian mi thil tithei leh langsar tak tak an inrawlha sawi a ni. Mahse, chiang faka sawi erawh a la awm lo zel thung.
Mamit District khawthlang lam Hachhek tlangdungah chuan tun thla ni khat atang khan dan lova an area chhunga kuhva rah tawlh luh chu Kuhva chingtu pawlten dangin, vawiin thlengin tha thlah lovin an la kal a, thlawptu pawh an ngah sawt hle. District dangah erawh chutianga hma la an awm awm hriat a ni rih lem lo thung!
Hachhek biala Kuhva chingtute hian Assam Police te’n kuhva rah phurte lo dang a, Assam lama luh an phal loh avangin kuhva rah hralhna kawngah harsatna an tawh nasat thu an sawi a,”Kuhva chingtute hi kan mangang tawh hle a, Mizoram sorkar in hma min lak sak vat kan beisei a, kan ngen a ni,” tiin an sawi a, an kuhva rah ngei ngei pawh Myanmar kuhva ro anga an ngaih vek tawh thu sawiin, an mangang tawh hle a ni.
Sorkar hian kuthnathawktute a hmangaih a, an hmakhua a ngai tak zet a nih chuan tun hun hi chetna hun tha a ni a, Commerce & Industries deptt a ni emaw, a kaihhnawih deptt. hrim hrim hi thupek khauh zawk chhuah tura a hrilh a hun tawh khawp mai. Chuti a nih loh chuan he sumdawnna hi a lian zel ang a, tualchhung miten kan tawrh reng ai chuan thisen hial a la chhuak lovang tih lah a sawi theih hek loh.

Leave a Reply

Your email address will not be published. Required fields are marked *

error: Content is protected !!