Europe khawmualpui chu Covid-19 lenna hmunpui a ni thar leh mek a, hei vang hian thuneitute chuan inkhuahkhirhna an kalpui thar ve mek.
Hetih lai hian inkhuahkhirhna duh lo hian mipui an tal nasa hle a. A?bikin Netherlands-ah an che nasa zual hle.
The Hague khawpuiah chuan inkharkhip dan thar duh lo mipuite chu Zirtawpni zana police nen an innawr hnuah Inrinni khan police-te chu halmawiin an vawm a, bicycle an hal nasa hle bawk.
A hma zan khan Rotterdam-ah chuan nasa taka buaina chhuakin police-in silai an hmet puak hial.
Austria, Croatia leh Italy-ah pawh mipui thinrim an inhawr khawm nasa hle.
World Health Organization (WHO) chuan khawmualpui puma coronavirus kai an pung chak leh mek chu ngaihtuah tham a nih thu an sawi.
Regional director Dr Hans Kluge chuan Europe-ah hian inkhuahkhirhna hman a nih vat loh chuan nakum thalah chuan mi nuai nga vel an thih tlin hial a rinawm thu BBC hnenah a sawi.
“Covid-19 hi kan khawmualpuiah hian thih chhan tam ber a ni leh thuai dawn a ni,” a ti a. “Mipuite chuan kan tih tur chu kan hre vek tawh a, invenna lak, hmai tuam leh Covid pass hman a ni,” a ti bawk.
Europe-ah hian ram tin deuhthawah hri kai an pun chak leh avangin sorkar chuan inkhuahkhirhna an kalpui thar leh mek a. Ram tam takah ni khata hri kai tam ber ni an tawng thar hlawm a ni.
Netherlands-ah chuan Inrinni zan khan khua leh khawpui tam takah inkhuahkhirh duh loh lantira tharum thawhna a thleng leh.
The Hague-ah hmai khuhten bicycle an hal a, riot police chuan sakawr, ui leh tiang nen an um let a. Thuneitute chuan emergency an puang a, mi pasarih an man tawh.
Police hian damlo phur ambulance tukverhah lung vawm luh a nih thu an sawi a. Police officer pangain hliam an tuar a, pakhat chu a khup hliam avangin ambulance-a phurh sawn hial a ngai niin an sawi.
Football inelna sang inkhel pahnihah mipuite khelmualah an tlan luh avangin inkhel tihtawp lailawk a ni a. Netherlands-ah hian coronavirus dan tharah entu awm phal a ni lo.
Rotterdam-ah a hma zan khan police-in silai an hmet puak hial a, ‘mipui chet dan chu nunna atana hlauhawm’ a nih vang a nih thu police thupuangtu chuan Reuters a hrilh.
Silaia kah vangin mi pathum chu damdawi inah hruai an ni a, thil thleng chhui chian mek a ni.
Netherlands-ah hian chawlhkar thum chhung inkharkhip nem deuh chi kalpui a ni mek a. Bar leh thingpui dawrte zan dar 8:00 thleng chauh hawn phal niin infiamna lam entu awm phal a ni lo.
Austria khawpui, Vienna-ah sorkarin inkharkhip leh invenna lak chu February, 2022 atangin tih ngei ngei tura a tih duh lohna lantir a ni a. Anni hi Europe-a vaccine lak ngei ngei tura ti hmasa ber an ni.
Austria ram pum hi Thawhtanni atang hian ni 20 chhung inkharkhip a ni dawn a, ni tin mamawh zawrhna dawr tih loh khar vek tur niin hna pawh in atanga thawh zel tura tih a ni bawk.
Croatia khawpui, Zagreb-ah sorkar hna thawk tan invenna lak vek tur tih duh lovin mi sang telin kawng an zawh a. Italy-ah pawh mi tam tak chu Rome-a Circus Maximus chariot-racing ground-ah sorkarin hnathawhna, pun khawmna leh vantlang inkalpawhnaa chuang turin ‘Green Pass’ certificate neih tur a tih duh lohna an lantir.
French thuneitute chuan Caribbean thliarkar, Guadeloupe-a inkhuahkhirhna siam duh loh lantirtute thunun turin police an tirh luh belh a. France ram awp pakhatahg hian mipui hian dar leh sumdawnna hmun an rawk nasa hle a ni.