Lunglei Municipal Council: LMC enkawltu Councillor thlan hun tur la sawi thei lo

Mizoram sorkara Council of Minister-in Lunglei Municipal Council (LMC) din rem ti tawh mah se LMC enkawltu Councillor thlan hun tur erawh sawi theih a la ni lo a, LMC kalpui tak tak a nih hma-in a area tur leh kalpui tum dan hrang hranga sawisel nei duhte tan thla thum chhung hun hawn a ni ang.
The Zozam Times zawhna chhangin UD&PA secretary K Lalthawmmawia chuan, danin a phut angin sorkarin LMC din a tum thu hi mipuite hnenah hriattirna tihchhuah a ni phawt dawn a, chutah chuan a huamchin turte tarlan a ni dawn tih a sawi a, a area huam chhunga cheng tupawhin sawiselna an neih chuan thla 1 chhung hun hawn a ni dawn tih a sawi.
K Lalthawmmawia chuan, “Mipui atanga Objection awm te chu uluk takin thlir ho leh a ni dawn a, chumi hnuah LMC a taka kalpui turin sorkarin thutawp a siam chauh dawn a ni,” a ti.
UD&PA secreatry chuan, The Municipalities Act 2007-in a phut angin LMC chhungah hian ward 11 a awm dawn tih a sawi a, LMC enkawltu Councillor thlan hun tur hi sawi theih a la ni lo tiin,”Danin a phut ang hrang hrangte tihfel phawt a ni anga, inthlan hun hi chu tunah chuan sawi mai theih a la ni lo,” a ti.
Tarlan tawh thin angin, LMC din rawtna hi April ni 16,2021 khan Council of minister thutkhawma ngaihtuah tura tih a ni a, hetihlai hian ward awmzat tur aia tam duan a ni a, chungte leh siam that ngai dangte siam that a nih hnu-ah November ni 16,2021-a Council of Minister thutkhawmah LMC din rawtna hi thlen leh niin, pawm a ni ta a ni.

Leave a Reply

Your email address will not be published. Required fields are marked *

error: Content is protected !!