Sudan sipaiten thla hmasaa thuneihna an chhuh ruala prime minister atanga an paih, pawn chhuak thei lova an hren zui, Abdalla Hamdok chu a nihna ngai chelhtir a ni leh dawn.
Sipai, mipui thlan hruaitu leh hel pawl hlui hruaitute inkara palai hna thawktute chuan inremna siam a nih thu leh sipaiten mi dang an hrente pawh chhuah vek an ni dawn tih an sawi.
October 25 khan Sudan sipaite hian emergency puangin mipui thlan sorkar chu an thiat.
He thil duh lohna hi ram mipuiin ram pumah lantirin mi 40 vel an thi hman.
Buaina tihreh nana inbiakna neihah Inrinni zan khan inremna siam a ni ta a, Pathianni khan a taka kalpui nghal tura tih a nih thu Sudan-a Umma Party hotupa, Fadlallah Burma Nasir chuan a sawi.
Hamdok-a pawhin thihna leh buaina chhuak zel tur pumpelh nen inremna hi a pawm a niin amah hnaihtu pakhat sawi chu Reuters news agency-in a tar lang.
Inremna zawnga palaite hi lehkhathiam, chanchinbumi leh politician te an ni hlawm a, inremna siam dan pawh an puang.
Prime minister ngai dah ngheh leh cabinet member-ten an nihna ngai an chelh leh tur bakah hian mipui rorelna tluantling a awm theih nana Sudan kalpui zel tur chu a kaltlang dawn tih an sawi.
Gen al-Burhan-a kaihhruaia mipui telna sorkar paih thlak a nih hnuah khan an ram khawpui lian hrang hrangah mipuiin duh lohna an lantir.
An khawpui, Khartoum-ah chuan mipui thinrim hi inkulhin lirthei ke an hal a, mipui rorelna tak tak nei tura an ramin kawng a zawh mek chu lambun niin an ngai a, tharum nen an che a. Sipaite pawhin an nawr leh a, tam tak an kap nia hriat a ni.
Inremna thar hi FFC-a tel pawl khat chuan an duh lo nia sawi a ni a, Pathianni khan duh lohna pawh an lantir ve a; mahse, inremna anga kaltlang a nih a rinawm.
Sudan-ah hian rei tak ro lo rel tawh, Omar al-Bashir-a paih thlak a nih hnuah August, 2019 atang khan sipai leh mipui aiawhtu, Forces for Freedom and Change (FFC) an tih chuan a intawmin thuneihna an chang.
Thla hmasa khan sipai hotupa, Gen Abdel Fattah al-Burhan chuan mipui aiawha thuneihna changtute hi thiatin a man vek bawk.
Gen al-Burhan-a hi thuneihna intawm sorkar, Sovereign Council-ah hian chairman ni lai a ni a, a hun hi tun thlaa tawp mai tur a ni a. Hemi hnuah hi chuan FFC-in an thlan chhuah chu an rama hotu a ni ve thung dawn a ni.
Gen al-Burhan-a hian a chet dan hi sipai sorkarna a nih loh thu leh politics pawl hrang hrang inkara inepnain tual chhung indona a tihchhuah mai loh nana hetianga ti hi a nih thu a sawi.
Thuneihna a chan hnuahhian thuneitu berah a indah a, an zingah hian sipai bakah hel pawl hruaitu hluite pawh an tel a ni.