Serchhip bialtu MLA in tui lian tuarte harsatna tawh dan enpui

Tun hnaia ruahsur nasa avanga Mat lui leh a fintu kawr lui lianin Serchhip Mat phai-a buh leh thlai chinna hmun a tihchhiat te Inrinni khan Serchhip bialtu MLA Lalduhoma’n a tlawh a, leilet neitute leh thlasik thlai hmun neitute chuan an harsat tawh dan te an lo thlen.
Serchhip bialtu MLA hnenah hian tuilian avanga harsatna tawk leilet neitute leh thlasik thlai hmun neitute chuan an harsatna tawh te an lo hrilh bakah nul neitute chuan tui a len avanga thlai chi thlak \hat leh ngai turah thlai chi-ah harsatna an tawh thu te an lo thlen a; an harsatna tawhah te a theih anga hma a lak pui tur thu Lalduhoma hian a sawi.
Tui lian avanga harsatna tawk leilet neitu leh thlasik thlai hmun neitu mi 47 te an in report thu leh in report lo te la awm theih a nih avangin mi 50 zen zawn ni tura ngaih a nih thu Serchhip bialtu MLA hian a sawi a. He’ng mite tan chhawmdawlna hi sorkarin a ti tura ngaih ni mah se, department changtu Horticulture department in chhawmdawlna a pek theih dawn loh thu leh DM&R ah thlen lehchhawn a nih tur thu a sawi bawk.
Lalduhoma hian tun hnaivaia an mamawh tur chu zikhlum chi a ni dawn tih pawh sawiin, hemi chungchang hi Serchhip a kal hma hian sorkar thuneitute nen pawh an sawiho thu leh sum dinhmun te thlirin a rang thei ang bera pek a nih loh chuan a season a ral mai dawn avangin department lamin an tih theih dawn leh dawn loh ni 2/3 an ngaichang ang a, an ti thei dawn lo a nih erawh chuan bialtu MLA a nihna angin an tihsak dawn tih a sawi a. “Sorkar pawhin rehabilitation bakah tuna eizawnna bul an \an leh theihna tura a chi pek te a ngaihtuah theih turah ka ngai,” a ti.
Thlasik thlai chingtute bakah hian buh chingtute pawhin harsatna an tawh thu hi bialtu MLA chuan sawiin, tunah hian an buh seng tawh \henkhat te chu a \o tawh tih a sawi a. Tun hnaia ruahsur chuan Serchhip Mat phai chauh ni lovin Mizoram hmun hrang hrangah buh te a tichhe nasa em em tih sawiin, scheme lian tham takin sorkarin hma a lak te an beisei phawt dawn tih a sawi bawk.
Serchhip bialtu MLA hian Chawm kai a\angin, Chamdur Zau, Vaivenga Zau, Tinglubul Zau leh Zawlpui buh hmun thlengin ke in a fang a, leilet neitute awm remchang apiang tlawhin a kawm a; helai Mat phai ruama tui lakna tur \ha deuh te, kalkawng (link road) siamna tur \ha leh remchang te leh Mat lui dai kaina tur remchang turte a thli thlai nghal bawk a ni.

Leave a Reply

Your email address will not be published. Required fields are marked *

error: Content is protected !!