Sorkar laipuiin kawngpui siamna’n Rs vbc 1712.67 pe

Ministry of Road Transport and Highways-in Pragati Ka Highway Project hnuaiah Mizoram kawngpui siamna atan Rs vaibelchhe 1712.67 a pe.
Union Road Transport & Highway minister Nitin Gadkari chuan Pragati Ka Highway Project hnuaiah Mizoram kawngpui siamna atan sum pek a nih thu hi inrinni khan a puang a, Chief Minister Zoramthanga’n social media kaltlangin sorkar laipui hnenah hian lawmthu a sawi ve nghal.
Ministry of Road Transport and Highways-in kawngpui siamna tur a sum a rawn pek hi Pawlrang – Rulchawm inkar kawng tih changtlunna tur leh Tuivawl leh Rulchawm inkar KM 2.458 a thui siam thatna tur Rs vaibelchhe 500. 88 a ni.
National Highway 6 Kolasib leh Sethawn Four lane-a siam na tur Rs vaibelchhe 720.40 leh National Highway 306 Vairengte leh Chhimluang inkar kawng four lane-a siamna tur Rs vaibelchhe 491.39 te a ni.
Thudawn danin, kawnpui siamna turah hian Mizoram sorkarin thuneihna a nei lo a, hemi atana thil \ul leh pawimawh, Contractor rawih te hi sorkar laipuiin ngaihtuah vek tur a ni.
Mizoram sorkar chuan tunhnai khan sorkar laipuiah EPC Mode in kawng siamna tur sum hi a zuk dil nia thudawn a ni a, hei hi rawn ngaihpawimawhin Ministry of Road Transport and Highways chuan Pragati Ka Highway Project hnuaiah kawng siamna tur sum hi Mizoram a rawn pe ta a ni.
Pragati Ka Highway Project hnuaia kawngpui siamna tur Rs vaibelchhe 1712.67 Mizoram pek a nih thu Union minister-in a puan hnu hian Chief Minister Zoramthanga chuan social media kaltlangin sorkar laipui hotute hnenah hian lawmthu a sawi ve nghal a, he hmalakna hian Zoram tan rah tha a chhuah ngei dawn tih a sawi.

Leave a Reply

Your email address will not be published. Required fields are marked *

error: Content is protected !!