Car-in kawng zawh lai pawng chil, mi panga thi


United States-a Wisconsin state-ah, Krismas parade nei lai chu car-in a pawng chil a, mi panga thiin mi dang 40 chuangin hliam an tuar bawk tih police-in an sawi.
Waukesha khawpuia parade-ah hian sikul band leh lâm thiamte pawh an tel a, khawpui chhungah kawng an zawh a. Hei hi SUV sen, chak taka tlanin a su ta vak a ni.
Naupang pawh telin, mi tam tak a su thlu.
Mi pakhat man a ni a, a chet dan hi a hun lai chuan firfiaka chetna a nih a rinawm loh thu thuneitu pakhat chuan a sawi.
An mi rinhlelh ber hi mipui zingah a tlan lut zui bawk a; mahse,?man a ni ta tho niin a chhuitute chuan an sawi.
Mi cheng pakhat, Angelito Tenorio chuan Milwaukee Journal Sentinel chanchinbu hnenah kawng zawhnaah hian amah pawh a tel zo chiah a, Pathianni tlai dar 4:40 (India rama Thawhtanni zing dar 4:10) velah SUV chak taka tlan hian mi dangte chu a su ta niin a sawi.
“A hnuah chuan a sutte te thawm leh au nuaih nuaih ri kan hre zui ta a ni,” a ti.
Corey Montiho chuan a fanu telna dance team chu SUV hian a su tih a sawi.
“Pom-pom leh pheikhawk leh chocolate a darh nuai a. Pakhat tlu ka pawmsawn hnuah ka fanu zawngin ka kal leh a ni,” a ti.
Fire chief Steven Howard chuan an department-in damdawi inah puitling 11 leh naupang 12 an dah thu a sawi.
Children’s Wisconsin hospital chuan damlo 15 an dawn thu an sawi a. Aurora Medical Center-Summit chuan mi 13 an enkawl thu leh pathum chu an nat hle thu a sawi.
Mayor Shawn Reilly chuan thil thleng chu a rapthlak thu leh lungchhiatthlak a tih thu a sawi.
Thil thleng avang hian Waukesha-a sikulte chu Thawhtanni hian an khar dawn a, a tuartute tan erawh counselling service an hawng thung.
Waukesha khawpuiah hian mi 72,000 chuang an cheng a, Milwaukee khawthlang lama awm niin hetiang kawng zawh hi an huaihawt ziah.
Thanksgiving Day hma Pathianniah hian kum tin an huaihawt a. Hengah hian maksak tak takin an inchei a, kawng zawh pahin an lâm a, lâm thiam pawh tam tak telin rimawi tum pawl nen an ni thin a. Kumin an thupui hi ‘comfort and joy’ tih a ni nghe nghe.
Kawng an zawh chhung hian chhung tinte chu kawngpui sirah an lo intlar a, an lo en a, an lo lawm thin a. Nikumah coronavirus avanga an tih theih loh hnuah kuminah phei chuan mipuiin an uar lehzual hle a ni.

Leave a Reply

Your email address will not be published. Required fields are marked *

error: Content is protected !!