EDITORIAL 23/11/21


Ram hruaituten an viak an tihthat lehzual a ngai tawh

Kar liamta khan Mat leh a fintu lui thenkhat lianin a tihbuai Serchhip Mat phaia leilet neitute thlai chinna hmun chu bialtu MLA, Lalduhoma chuan a hmunah kalchilhin, an harsatna tawh dante a enfiahsak a, a tul anga hmalak nghal a ni bawk.
Ram a thang zel a, agriculture lama hmasawnna kan ngaipawimawh chho a, kuthnathawktute kan ngai pawimawh a nih tak tak chuan ram hruaitute tan pawh kan viak kan tih that leh zual hi a ngai tawh hle reng a ni.
Tuna Serchhhip bialtu MLA in kuthnathawktute a tlawhna hmun pawh hi a hla tham hle nia sawi a ni a, leilet neitute tan chuan a lawmawm dan a danglam zual hlein a rinawm bawk.
Hetiang kawngah hian kan Agriculture minister hi a fakawm thin hle bawk. Agriculture kaihhnawiha harsatna lian tham a awmin, a hmunah a kalchilh a, an harsatna a enfiahsak thlap thlap thin bawk. Ram hruaitu tha kan ni duh a nih chuan kan viak kan tih that hi a tul a, hmasawnna hnathawh kawngah a pawimawh hle thin bawk a ni.
Ram a thang zel a, politician tha tak tak pawh an lo la chhuak zel dawn a, kuthnathawktute kan hmangaihna hi a thu chauha chhak chhuak lovin, a taka kan chantir a hun tawh hle a ni. Politician viak tha tak tak an lo chhuak zel bawk nen, a taka kan thawh chhuah hi a hun tawh reng bawk.
Inthlan dawn chauh a kuthnathawktute hi hmangaih an hun tawh lo a, rorelna fawng kan chelh hnu thleng pawha a taka kan hmangaih chhunzawm hi a tul tawh hle a ni. Thil tithei dinhmuna kan din hun chiah hi kan hmangaih theih hun tih hre chunga, ram hruaitute pawhin kan viak kan tihthat lehzualte pawh a ngai e.

Leave a Reply

Your email address will not be published. Required fields are marked *

error: Content is protected !!