A hun takah an player pawimawhten an tih tur an ti chat chat thin a, mamawh hunah a chhanna an neih theih zel avangin Ramhlun Venglai Cricket Club in season bul tanna inelna President’s Cup 2021 champion trophy an chawi.
Suaka Cricket Ground-ah Thawhtanni ah Chhinga Veng Cricket Club nen final an khel a. Ramhlun Venglai hian run 31 in hnehna an chang.
Final hmuhnawm
Vawm hmasak thlang Chhinga Veng lakah Ramhlun Venglai in bul an tan that an chhawr a. Run 69 an siamin an wicket hmasa ber a tla a, wicket hnih an hlohin run 93 an siam.
Captain Reuben Lalhruaizela’n bul tanin ball 36 atangin run 50 a siam a. Opener dang Vanmalsawma’n run 20 a thawh a, wicketkeeper batsman Lalhmachhuana chuan 6 runs vawi li a vua a, ball 27 atang run 43 siamin over 20 chhunga run 138 an siam nan a tangkai.
A vawm lamah pawh RVL an che tha a, tun tournament a bowler rintlak Lalrinfela Zadeng chuan wicket li a la a, midang pali in wicket hnih theuh an la.
Chhinga Veng tan Jonathan Lalrinchhana’n run 35 a siam a, run 17 siam Jonathan Lalbiakkima nen over 8 chhung vel partnership nei hman mahse RVL bowler te vawm that zarah run rate an ti sang hleithei lo thin.
3C tan opener K. Vanlalruata (17) leh Lalthlamuana (10) ten an tanhmun an siamrem tan dawn tihin an wicket an hloh bawk a. An middle-order batsman dangte atang run an hmuh tam loh bawk avangin over 18.4-ah run 107 siamin an out zo.
RVL in an phu
Ramhlun Venglai in an player naupang tha za leh tawnhriat neitha tawhte a inbuk tawk takin an chhawr thiam a. Tun President’s Cup ah an khelhthat ni ni lem lovah pawh hnehna chang turin hun pawimawhah danglamna an siam thei thin.
Captain Reuben Lalhruaizela’n an mamawh hunah run leh wicket pawimawh a la thei thin a. Hmahruaitu tha a ni. Wicket la hnem ber Afeltea’n a vawm lamah danglamna a siam ngun a. Final an luhna kawngah inkhel pawimawhah Mizoram player Joseph Lalthankhuma a chetthat zar an zo bawk.
Chhinga Veng in final an luhna kawngah an theihna a sang a, an squad a chhah tha tih an lantir thin. Mahse fina inkhel erawh an chan tur a nih loh tum an tawng a, bat nen ‘first gear’ an chhuahsan hleithei lo a ni ber.
Thildang
Champion team in Rs. 20,000 an dawng a, a tlawm zawkin Rs. 10,000 an dawng. Tournament a team tel zawng zawngin match fee an dawng vek a. First round a tla in Rs. 5000 an dawng a, round dawtleh a chakin Rs. 8000 dawngin, round tinah match fee hi cheng sangthum zelin a pung.
Player of the tournament in Rs. 2000 an dawng a, Best Batsman leh Best Bowler ten Rs. 1000 an dawng.
Player of the Tournament : Reuben Lalhruaizela (Ramhlun Veng CC)
Best Batsman : Rahul Sunar (Gorkha Cricket Club)
Best Bowler : Lalrinfela Zadeng (Ramhlun Venglai Cricket Club)