Sorkar hnathawk inzawmkhawm pawl, Federation of Mizoram Government Employees & Workers (FMGE&W)-in tun hnaiah Mizoram sorkar hnathawkten a hun taka hlawh an lak theih loh thu leh dearness allowance (DA) chungchangah pawh sorkarin an chanvo a pe mai lo nia sawiin, pe thuai turin sorkar an phut.
FMGE&W chuan sorkar hnathawkte chu a hun taka hlawh pe \hin tur leh pek tlai an nih pawhin interest nena pe turin Supreme Court order a awm tih sawiin, hun eng emaw chen chu Mizoram sorkar hnathawk eng emaw zatin a hun takah hlawh an la thei thin lo tih an sawi a. A hun taka hlawh lak loh avanga harsatna tawk tam tak an awm tawh tih sawiin, a hun taka hlawh pe thin turin sorkar an ngen.
DA pawh Mizoram sorkar hnathawkte chu central hnuaia hnathawkte rate ang zel pek tur a nih thu pay rules-ah chiang taka ziah lan a nih thu FMGE&W chuan an sawi a. Kumin July 1 atang khan central sorkar hnathawkte chu DA 31% pek an ni tawh tih sawiin, Mizoram sorkar hnthawkte chu 17% chauh pek an la nih thu leh pay rules anga DA pe ve tura tum thum ziaka an thlen tawh chung leh tawngkaa hotute an dawra, sorkar sum harsat avanga DA punna chu pe chhuak lova GPF-ah dahsak an nih pawha an hriatthiam theih tur thu thlenga sorkar hotute an hriattir hnu pawhin an la hlawhtlin loh thu an sawi a. Rules anga DA pe thuai tura sorkar an ngen nawn leh thu sawiin, an chanvote an chan theihna tura a tul anga hmalak zel an tum thu an sawi bawk.