Trinamool Congress (TMC) MP-te chuan Thawhtanni khan Union Home Minister Amit Shah hmuin Tripura-a tual chhung rorel khawl inthlan dawna an party mite police-in kut an thlak chungchangah hma laksak turin an thlen.
“Kan hruaitute an man dan leh MP-ten kut an tawrh dan kimchang kan hrilh a. Tripura chief minister pawh niminah phone-a a biak thu leh report a beisei tih a hrilh tih a sawi,” tiin TMC hruaitu, Kalyan Banerjee chuan a sawi tih news agency ANI-in a tar lang.
Home Minister Shah hmutu zingah hian Derek O’Brien, Sukhendu Sekhar Roy, Santanu Sen, Kalyan Banerjee leh Mala Roy pawh telin an vaiin MP 11 an ni.
Trinamool MP-te hian Pathianni khan Tripura-a campaign laia BJP worker-ten an tihbuai thu sawiin hmun eng emaw zatah party pahnihte hi an intibuai.
Trinamool chief Mamata Banerjee pawhin Thawhtanni vek khan an party worker-te a tan thu leh tun kara Prime Minister Narendra Modi nena an inkawm hunah pawh a sawipui dawn thu a sawi.
West Bengal chief minister hian Tripura Chief Minister Biplab Deb chu beiin a kaihhruai state chu dan awm lohna ang maiin a siam niin a sawi.
“An kal dan, BJP leh chief minister hian Supreme Court thu ngei pawh an palzam a. Tripura chungchang hi Delhi, Mumbai leh hmun dangah pawh sawi zel a ni ang. Hemi chungchangah hian prime minister pawh ka hmu dawn a, thuneihna chan an duh em avangin an hmaa awm apiang an nawr zel mai a ni,” a ti.
Tripura-ah hian TMC MP dang, Mamata-i vahpa, Abhishek Banerjee chu la awmin phalna nei lo chungin roadshow neih a la tum.
Kar liam ta khan Tripura-ah hian party pahnih inkarah hian buaina hrang hrang a chhuak a, police chuan TMC youth wing leader Saayoni Ghosh chu vantlang inkhawm tibuaia puhin an man a, he inkhawmah hian Chief Minister Deb-a pawh a tel.
Union minister hlui, BJP hruaitu thin, Babul Supriyo pawhin Inrinni khan BJP miten a campaign lai an tibuai niin a lo sawi tawh bawk a, BJP worker-te erawh chuan he puhna hi an pha thung.
Tripura-ah hian tual chhung rorel khawl inthlan hi Ningani hian neih a ni dawn a ni.