Odisha-a Ganjam district-ah, Berhampur khawpuia observation home-a dah mek kumtlinglo paruk chuan a vengtu beiin Thawhtanni tuk khan an awmna atang hian an tlan chhuak.
Berhampur Juvenile Justice Board enkawlna hnuaia awm, mipa naupang bikte awmna tura tihah hian heng mite hian tukverha dalna siam chu an tichhe bawk a. Zing dar 2 leh 3 inkar vela tlan chhuak nia hriat an ni.
Observation home-a Superintendent Rameswar Rout chuan Baidyanathpur police station-ah an hriattir tawh thu leh tlan chhuakte hi man leh an la nih loh thu a sawi.
Home-ah hian pawikhawihtu chi hrang hrang, kum la tling si lo mi 116 awmtir an ni a. Tun tum hi a awmte tlan chhuah vawi khatna a ni lo thung.
May, 2020 pawh khan mipa naupang 27 zet chuan chem leh thingfak hmanga anmahni vengtu beiin an lo tlan chhuak tawh.
Odisha-ah hian observation home 16 neiin heng zinga pakhat chu Berhampur-a mi a ni a. Centre for Child Rights of National Law School of India, Cuttack-in kum 2015-a a zir chiannaah chuan Odisha-a observation home hian harsatna tam tak an nei tih a sawi.
Berhampur home-a dormitory pawh hi naupang kum 10 leh 18 inkar 40 awm theihna tura ruahman ni mah se 58 zet an awm a. Survey-ah hian home tinin an neih tur inkaihhruaina hrang hrang – children suggestion box, child protection protocol tar, food menu chart, children committee siam, risk management plan neihte pawh a awm lo hlawm a ni.
Heng bakah hian professional counselling leh naupang zirtirna dangte pawh an kalpui ngai lo bawk a. Guard pawh tam zawk dah a ngai tia sawi a lo ni tawh bawk thin.
Observation home an tihte hi kumtlinglo, thil tihsual avanga man, an chungthu ngaihtuah mekte dah lailawkna a ni.
Indian Penal Code hnuaiah hian naupangte hi eng emaw chen dah hran an ni a. An chungthu hi Juvenile Justice (Care and Protection of Children) Act, 2000 leh Amendment Act, 2006 Section 4-in thuneihna a pek angin Juvenile Justice Board-in a ngaihtuah tur chi a ni.
Pawikhawihtu naupang, man tawh, an chungthu ngaihtuah laite hi hetiang home-ah hian thla li vel dah thin an ni.