State Vector Borne Disease Control Programme (SVBDCP) chhinchhiah danin nikum aiin kuminah Mizoramah sikserh vei zat 46.9%-in a tlahniam.
SVBDCP-a thawktute hian nikum 2020 January-October inkar chhunga Mizorama sikserh vei zat leh kumin hemi hun chhung veka sikserh vei inthlauhna an chhut chhuak a, kumina sikserh vei tlakhniamna hi zaa 46.9 a ni.
Tun hnai hian Mizoram chhunga sikserh vei tam zualna District pathum – Lunglei, Lawngtlai leh Mamitah te Malaria test runpui kalpui mek a ni a, tun thlengin mi 54,085 endikah, Malaria PF vei 798, PV vei 107 leh PF leh PV vei kawp pakhat, an vaiin 906 hmuh chhuah tawh a ni.
Sikserh vei hmuhchhuah zawng zawngte hi a thlawn vekin damdawite pek nghal zel an ni a. He hmalakna, Mass Screening & Treatment (MSAT), November 8 atanga ni 20 chhunga positivity rate chu 1.90% a ni.
He hmalakna hi Mizorama sikserh vei a tlakhniam mek laia case pung zel tur tihchimit tuma beihpui thlakna a ni a. Khawsik a awm chhan hi Covid-19 mai ni lovin, dengue leh malaria vang a ni thei a; chuvangin, SVBDCP chuan mi tinte Covid-19 negative mah se malaria leh dengue pawh lo in-test zel thin turin an ngen a ni.