Tuikum bialtu, Dy. speaker ni bawk Er. Lalrinawma’n COVID19 avanga harsatna tawk mek, a biala Sialhau khua chu nimin khan a tlawh a, 4C a mamawh tur bungruate bakah mamawh dang leina atan MLA fund atangin Rs. 70,000 a pe.
Er. Lalrinawma chuan hrileng chuan ziaawm lam panin lang mahse, mitin fimkhur zel a la pawimawh thu a sawi a. Hri lengin eng chen nge a la awh dawn tih a hriat loh avangin nunphung tibuai lutuk lo zawnga khawsakpui thiam zir a ngai chho ta nia a lan thu leh inkhuahkhirhnate pawh her rem thiam a tul chho zel nia a lan thu a sawi.
Bialtu MLA chuan ministry of tribal affairs atanga sum hmuh hmanga sak mek Sialhau Handloom centre sak mek pawh tlawhin, Tuikum bial chhunga puantah zirtu tam berna khua an nih avangin Handloom centre chu an la chhawr tangkai hle dawna a hriat thu a sawi a. Tuikum bial chhunga puantah lama tui leh eizawn tumte tana hmalakna liantham tak kalpui tura ruahmanna siam mek a nih thu a sawi bawk.