Europe ram chu Covid-19 kai pung chakin nasa takin a tibuai leh mek a, thlasik in\an mekah damdawi inte indaih lohna a thleng tan mek a. Ram tam takin kai tam ber ni an tawng hlawm.
Slovakia-ah chuan darkar 24 liam ta chhung khan mi 10,315-in an kai tih hmuh chhuah a nih thu an ram health ministry chuan a sawi.
He ramah hian mi maktaduai 5.5 emaw chauh an cheng a, khawvel pumah mihring cheng zat a\anga chhuta hri kai pun chakna ber ram a ni mek.
Minister-te chuan Thawhlehni zan khan hun rei vak lo chhung inkharkhip mai tur em ni ang tih an sawiho va. President Zuzana Caputova chuan inkharkhip hi ‘inkhuahkhirhna hman chakawm loh; mahse, pumpelh theih miah si loh’ niin a sawi a, an inkhar ngei hmel hle.
An \henawm, Poland-ah pawh sorkarin inkhuahkhirhna thar kalpui mah se mi 28,380 zetin an kai tih hmuh chhuah leh a ni a. Czech Republic-ah pawh mi 25,000 chuang zet kai hmuh niin an ramah ni khata hri kai hmuh an tam ber ni a ni thar.
Europe khawmualpuia ramte hian hri leng darh zel tur danchah nen hian inkhuahkhirhna hrang hrang an kalpui thar mek zel hlawm a. Ram \henkhat chuan invenna la la ve lote chu vantlang hmun – thingpui dawr, ennawm chhuahna leh pun khawmnaa an tel an phalsak lo.
Austria ram bik erawh tun kar a\angin an inkharkhip hmak thung a. Mipuite chu a theih anga tam in lam a\anga hna thawk tur leh ni tin mamawh thil zawrhna ni lo dawrte inkhar vek turin an ti bawk.
World Health Organization chuan March thlaah chuan Covid-19 avangin Europe leh Asia ram hmun thenkhatah mi 700,000 zet an thi dawn niin a sawi.
WHO hian Europe region a tihah hian Europe pum leh Asia khawthlang lam ram thenkhat a huam a. Hengte hi ram 53 niin hri leng thihpui hi mi maktaduai 1.5 an tling tawh.
March 2022-ah chuan ram 49-a damdawi ina intensive care unit-te chu an buai tak zet dawn niin WHO chuan a sawi lawk bawk.
Europe khawmualpui hi hriin a tihbuai nasat leh tak em avangin ram tam tak – France, Germany, Greece leh a dangte chuan invenna bikima la tawhte chu a tihchakna, booster jab an tih chu an pe tan.
Hetih lai hian sorkarin khuahkhirhna a kalpui duh lohna nasa takin an lantir mek bawk a. Netherlands-ah chuan zan eng emaw zat chu inkharkhip nem zawk an kalpui duh lo mipuiin buaina an siam tawh.
WHO chuan Covid hi Europe region-a thihpui tam ber a ni thuai dawn tih a sawi.
“Tuna kal dan ang hi chuan nakum thalah hian mi maktaduai 2.2 chuangin an thihpui ang,” tiin Thawhlehni khan a sawi.
Ni khata Covid vanga thi hi tun hnaiah a leta pungin mi 4,200 dawn a ni zel tawh tih a sawi bawk.
Europe-ah hian invenna la la ve lote leh Delta variant chu hri kai pun chak chhan ber pakhat niin WHO chuan a sawi.
WHO-in Europe region a tih hian European ramte bakah Asia khawmualpuia ber, Israel leh Soviet ram zinga mi thin, Tajikistan leh Uzbekistan a huam a ni.