Kum tawp atang ram dang thlawhna beiseiawm


Indian Aviation Ministry Secretary Rajiv Bansal chuan ram dang nena intlawhpawh thlawhtheihna bik chu kumin kum tawpah dan pangngaia a kal leh theih tawh a beiseiawm thu a sawi tih news agency PTI chuan a tar lang.
Nikum March thlaa coronavirus avanga India a inkharkhip atang khan ram dang atanga thlawh luh leh chhuah (India mi ram danga awm hruai haw leh bungraw phurhna tih loh) chu tihtawp vek a ni.
India-ah hian hri kai hmuh an tlem hret hret a, invenna pek zel a ni bawk a, intlawhpawh thei bik ‘air bubble’ a neihpui pawh India hian tipung hret hretin tunah chuan ram 25 nen an intlawhpawh leh tawh.
Kar hmasa khan Civil Aviation Minister Jyotiraditya Scindia chuan ram dang nena thlawhna hmanga inpawh leh hi ngaihtuahin dan pangngaia kal a hnaih leh tawh tih a sawi.
Hetih rual hian coronavirus kai tamna ram, a bikin Europe ram lian nena intlawhpawh nghal mai tur erawh chuan ngaihtuahna sen a la tul tur thu a sawi bawk.
Ram chhunga thlawk bik erawh thla hmasa atang khan dan pangngaia kalpui leh tawh a ni.
Sorkar hian ram chhunga thlawk bik chu thla hnih a dintir hnuah nikum May atang a thlawhtir leh tan a; mahse, a chuang thei zat bituk zel a ni.
Airline-te chu a hmaa an thlawh thin 33% chauh thlawhtir phawt an ni a. Devember khan 80%-ah tihpun niin tunah erawh dan pangngai a ni tawh.
A chuang thei pawh hri leng thawh hnihna hnu deuh, June khan 50% tih a ni thar leh bawk.
Ram dang nena inthlawhpawhna hawn tum leh mek a nih lai hian thla hmasa khan tourist visa pawh November 15 atang khan pek leh tan a ni.

Leave a Reply

Your email address will not be published. Required fields are marked *

error: Content is protected !!