Party Politics hi bo se

  • Mahmuaka Chhakchhuak

Kan ram Political platform ah hian Party Politics hian hmun pawimawh leh hmun chungnung ber ber a luah lo thei lo a, chumi chuan kawng tam takah rah tha a chhuah laiin rah tha lo a chhuah bawk a. UT kan nih tirh atanga vawiin thleng hian hetianga Party Politics hi kan la kalpuiin kan thatpuina aiin kan chhiatpuina hi a tam zawk mai lawng maw tih turin hnial rual lohin mitin hriat phakin thil tam tak sawi tur a awm a ni. Hei vang hian Party Politics hi tibo turin mipui (voter) lam hian eng Party nge tih aiin amah a tha em tih rilru pu chunga vote kan thlak tawh thin hi thil tul tak niin a hriat.
Party Politics hian mi tha tam tak a up hlumin che thei loin a up bet thin a, chu chuan anmahnia theihna leh chakna awmte hman theih loh turin an awm phah ta thin. Party-in ze hrang theuh an neiin kalphung leh uar bik te pawh an lo nei thin a, chutiangte chu an tha emaw a tha lo emaw Party-a awm chuan uar alo ngaih thin bawk avangin vawiinah ngei pawh hian Zoram Politics chhungah hian chutiang chu kan mutan lian tak alo nih phah thei ta hial a nih hi. Tuna kan hrawn mek – MNF Sorkar ngei pawh hian inthlan hmaah khan ‘Nuai thum sem’ te kha au loin vote zawnna hmanrua atan hmang lo sela chuan mipui lamin heti takin kan beisei lo mai tur a nih laiin an lo aupui nasat avangin leh video clip ngei pawh mitinin kan kawl fur bawk si avang hian an sorkar tan tirh atangin hei kum hnih hnu thleng pawhin kan la beisei a nih hi. Hetiang thil avang hian anmahni zinga mi tha leh fel tak takte tan thu dang sawi thin mahsela an thusawi kan rin loh phah thinin mipui beng an tih thlep phah thin hial a ni.
MNF chauh an ni lo a, Congress leh ZPM te ngei pawhin kalphung leh uar bik an neiin mipuiin chungte chu kan lo chhinchhiah lo thei thin si lo a, vawiinniah hian mipuiin anmahniah beisei an neih phah ta tlat thin a, sorkarna lo changin rorelna fawng pawh lo chelh mahsela chumi an tihhlawhtlin hma chuan anmahniah beisei tur awm reng a ni dawn tho thin. Kalphung Thar tih pawh hi ZPM pawhin an sawina a rei tawh tehlul nen Tuirial bial By Election Campaign kharna hun, Oct. 27, 2021-a Kawnpuia Pu Lalduhoma’n a sawi hma kha chuan hruaitute sawi dan lah alo inang chiah lo bawk nen mipui lam chuan kan chiang lutuk lo em ni a tih theih a. Heng Kalphung Thar point 24 laite hi thil tha tak tak ni pawhin a hriat a, sorkarna an chan hunah hian mipui lam chuan anmahniah leh an hmalakna tura kan beisei hmasak ngei tur a ni.
Heng bakah hian Party Politics hian mi tha lote pawh a humhim fo thin avangin leh an diklohnaah ngei pawh a chhan tlat thin avangin mipui lam tan chuan anmahniah rinna nghah a har phah a, beisei a bo phah thin. Tumah mi famkim leh Vantirhkoh thianghlim ang maia thianghlim kan awm loh avangin kan fellohna leh that lohna lo awmte ngei ngei pawh sawi pial mai loa an nihna ang anga lantir thin zawk kha mipui lam chuan kan pawm thei zawk mai thei awm e. Nimahsela kan ram hruaitu tam takte chuan fel famkim an tum tlat thin avangin thil tereuhteah pawh insawi fihlimna tur an zawn zel thinin awlsam takin FIR thehluh lam an buaipui leh mai thin bawk si a. Hei vang hian mi tam takte’n an thinlunga sang taka an lo dah tawh thinna atang ngei pawhin an tlak tlak leh phah thin. Dan lamah thiam chang thin mahsela mipui thinlungah thiam an chang tak tak thei ngai chuang si lo a. Chutiang chiah chuan social media lamah thiam takin lemchang bawk thin mahsela mipui thinlungah pawm tak tak theih lohna a awm tlat tawh thin bawk a ni.
Hetianga ram hruainaa lemchanna dawhsan ang maia lem chang an awm thin avang hian mi tam takte chuan mi dik leh tha an lo zawng ru reng a, sawiri kher lo mahsela Political Party tinah hian mi tha leh chhuanawm tak tak chhinchhiah hi an lo nei bawk thin. Tuna kan ram hruaitute zingah ngei pawh hian mipui lam chuan anmahnia beiseina sang tak tak an neihte an awm a, nimahsela chungte chu Party lamin an up beh sak tlat si avangin an chet theih loh phah hial thin si a. Hei vang hian Party system hi kan ram tithuanawptu lian tak a ni theiin a ni mek bawkin a hriat a, kan tihboa kan bansan vat loh chuan hei aia nasa zawk hian kan la chhiatpui zel dawn ni tein a hriat.
Nakin lawkah ngei pawh kan la inthlang lehin ram hruaitu kan la thlang leh ngei ang a, Political Party atangin mi tha tak tak an la rawn vawrhchhuak leh ngei ang. Chungte chu mipui lamin anmahni thatna leh felna aia Party avang zawka vote kan thlak chuan kan ram hian hmasawnna nei tak tak loin a ngai te bawkin kan kal leh thei a ni. Kum 1972 atanga keimahni puala ram hruaitu kan neih atanga mipui lamin ram hruaitutea lungawihna tak tak kan la neih theihlohna hi a tihbona kawng pawh kan hrereng a, chu kawng chu kan zawh duh tlat si loh chuan tuar zel tlak pawh kan ni awm e. Kan thenawm State te zingah keini aia dinhmun hniama kan ngaih thinte ngei pawhin kalphung fel tak neia keini aia dinhmun awhawm taka awm tawhte chu kan mit leh bengin a hre ve zel bawk si a, an ruala hmasawnna kalpui ve hi kan duhin kan chak tawh a ni. Chumi ti thei tur chuan kum 30 chuang tawh Party system kan kalpui hi harsa tak chunga kan tihbo a ngaiin a hriat.
Veng chhunga hmasawnna hnathawh lam chu sawi loh, AAY/ BPL leh sorkar lam atanga mi harsa zawkte tanpui kawng hrang hrangah ngei pawh Party system in hmun pawimawh a chan tlat thin hi chuan khawtlangah rorelna dik leh fel a awm tak tak thei ngai lo a, rualkhai lo taka hmasawnna kalpui hi a tlo ngai hek lo. Chutianga kawng hrang hranga mipuiin harsatna kan tawh thinte tihbona atana pawimawh tak nia lang chu Party hrang hranga mi thate thlanchhuah a, chung mite chuan rorelna fawng an chelh chu a ni ber awm e. Rorelna hmun sang ber atanga Party lamin hmun pawimawh a chan lohna atana Party mal niloa Party hrang hrang thawhhona, Coalition sorkar kan tih hi kan ram hian a mamawh leh tawh niin a hriat.

Leave a Reply

Your email address will not be published. Required fields are marked *

error: Content is protected !!