UEFA Champions League champion lai in kuminah an lallukhum chhuhsak turin an hma a dingten an sual fe a ngai dawn tih an lantir a. Juventus mikhualin goal li an hawn tir a, round of 16 a an hmun an tichiang.
Stamford Bridge-ah Chelsea hian kuminah champion nawn tura rin loh ngawt an theih loh tih an tilang a. Premier League hmahruaitu ni mekin Italian club hi Champions League chanchina an tlawm chian ber tum an hmantir.
Europe huap inelna a Blues tana bul a tan hmasakna berah defender goal khung thei Trevoh Chalobah chuan minute 25-naah goal a khung a. Hei hi minute 55-naah kheltha tak mai Reece James chuan belhchhahin Wojciech Szczesny dan theih lohin goal a khung.
Juventus an harhchhuah hma in Chelsea bawkin goal an khung leh thuai a, minute thum hnu lekah hnip leh mawi taka ball in pass kualin tlarhnung an thiat a, Callum Hudson-Odoi chuan goal thumna a khung a. Huntawp dawnah Juve midfielder Weston McKennie chetsual zarah Hakim Ziyech chuan Timo Werner goal khung t5ur a siamsak.
Chelsea hi an group-ah hmahruaitu an ni mek a, mahse matchday hnuhnung berah erawh group hmahruaitu an la nih dawn chuan Juventus result in a zir a la ngai dawn a. Anni in Zenit St Petersburg an tlawh laiin Turin-ah Malmo an khel ve dawn thung.
Group hmahruaituten knockout stage a draw neih hunah khingpui khauh zawk kalsan theihna an neih avangin hmahruaitu nih a pawimawh thin.
Tuchel-a Blues ngei chu
Chelsea manager Thomas Tuchel-a’n a enkawl hnua an danglamna leh hmasawnna in fak a hlawh lo thei lova. A hnuaia vawi 50 an inkhelh atangin vawi 35 an chak tawh.
September thla a Turin a an tlawm tawh avangin Chelsea tan chak a pawimawh a. An tum ang taka an khelh avangin German coach a lawm.
“Turin-ah kan huai tawk lova, zaninah chuan kan goal nawr danah pawh hlauhthawn nei reng lovin kan khel. Inkhel thunun ringawtin kan tibuai thei lova, an lakah kan tlan taihmak a, an tlarhnung thiat tura kan thawhrim a ngai. Goal hlauhawm siam an lakah hian a awlsam lo, mahse kan insiam hnem thei khan kan khelhthatzia a tilang chiang hle.” tiin a sawi a.
German coach hnuaiah hian Chelsea goal ven danin fak a hlawh a. Game 50 chhungin goal 24 chiah an chhuah a, hei hi manager tana British record a ni. Thawhlehni zan inkhel bikah a hnung ven chauh ni lovin goal nawrah pawh an tlarhma an kim lo chungin goal hlauhawm siam dan tur an player-ten an hria tih a hmuh theih.
Blues tana chanchin lawmawm lo awm erawh player inhliam an neih belh a ni a. First half-ah N’Golo Kante lakchhuah a ngai a, second half-ah Ben Chilwell pawh lakchhuah ngai lehin kartawp a Manchester United hmachhawn tur team hian an player pawimawhte hi an chawlh rei loh an beisei.
Europa League-ah Zenit
Group H inkhel dangah Malmo in an mikhual Zenit St Petersburg an hneh thei lova. Player 10 a inkhel hmang zo Russian club in huntawp dawnah penalty hmanga an si phurh sutin point pawimawh an hmu a, pathumna an ni chiang dawn.