Khelmual chhungah an che chhia a, hei vanga an manager Ole Gunnar Solskjaer an ban hnuah Manchester United in interim manager Michael Carrick hnuaiah a vawikhat nan inkhel an hmachhawn a. An club in inthlak danglam hunlai hmang mahse danglam lo pakhat a awm a, chu chu UEFA Champions League ah hnehna chang turin Champions League player ropui Cristiano Ronaldo bawk an mamawh.
United in Estadio de la Cerámica-ah Villarreal an hmachhawn a. Minute 70 chhung beisei angin khel lo mahse a tawp an khar tha a, Cristiano Ronaldo leh Jadon Sancho ten goal an khung a. An chak avangin an group-ah an sang ber dawn chiang.
Minute b78-naah United midfielder Fred-a’n Etienne Capoue chetsual chu remchangah a la a, Ronaldo-a’n ball chang zuin goalkeeper Geronimo Rulli pet khumin goal hmahruai a khung a. Huntawp dawnah United player hlauhawm ber Sancho-a’n a phu ang ngeiin goal a khung.
First half leh second half tir lamah erawh United chu si phur hmasa zawk tur an ang zawk hle a. An goalkeeper David de Gea chaun chiang takin vawi thum an goal chhuah tur a chhanhim.
Inkhel lehlamah Atalanta leh Young Boys te 3-3 a an inhnehtawk ve avangin United hi an group-ah an sang ber dawn chiang tawh.
Ole-a tan
Carrick-a chuan an chak hnuah an hnehna chan chu manager ban tak Ole Gunnar Solskjaer-a vangah a ngaih theih thu a sawi a. “Tunlaia kan boruak club chhunga mi leh sa tu tan pawh hun harsa a ni a, chuvangin he hnehna pawh hi Ole-a tan ang hialin a ngaih theih.”
“Kan tih tur kan hria a, kan dinhmun tihchian kan mamawh tih kan hria. He hna ka thawh hi a ngai tih pawh ka hria a, zaninah kan tum angin thil a kal, a lawmawm. Result tha neih lova, chetthat loh a kaltluan chuan team leh mimal ang pawhin thil tih a har thin a, mahse zaninah kan tlozia kan lantir thei.” tiin an chak hnuah a sawi.
Ernesto Valverde an bia
Manchester United hian Barcelona manager hlui Ernesto Valverde chu tun season tawp thlenga an interim manager ni turin inbiakna an neihpui.
Paris St-Germain coach Mauricio Pochettino chuan United hi a enkawl duh nia ngaih nimahse season laklawh laia lakchhuah a hautak dawn niin United in an ngai.
Hei vang hian kum 57 mi Valverde hi an mi ngaihven zingah an telh thar leh a, ani bakah Ralf Rangnick pawh sawi tel a ni bawk.