Bill pek laia buai thin chin fel tumin department-in hma la

Power & Electricity Department (P&E)-in êng chhit man (electric bill) pekna kawnga mipui harsatna tawh thin chu pawi an tih thu leh he harsatna sukiang turin theihtawp chhuaha hma an lak mek thu an sawi.
Er. Lalhminghlua, EE., P&E Revenue Division chuan êng chhit man pek kawngah mipuiah harsatna thleng thin chu pawi a tih thu sawiin, “Kan customer-te tan harsatna awm thin hi pawi kan tiin nuam lo pawh kan ti. Chu mai bakah hna a inkhawl khawm avangin thil tih zung zung a harsat phah a. Hemi chungchang hi kan vei khawp mai,” tiin The Zozam Times zawhna a chhang.
Tun hnaia êng chhit man pek kawnga mipuia harsatna thlen chhan sawiin Er. Lalhminghlua hian, “Server a down chhan chu Guwahati lam link fuh loh vang a ni a. Hei vang hian êng chhit man pek hun pawh hawn belh a ngai hial a ni,” a ti a. Guwahati link fuh tawk lovin harsatna a siam thin piah lamah, electric bill pekna hmun thenkhat harsatna awm thin chu connectivity line lirtheiin a lo tai chat vangte a nih thu a sawi bawk.
“Veng thenkhatah bill pek theih loh hi a awm leh thin a. Hei hi power suupply line ni lovin connectivity line-te a lo ni tawh thin a. Connectivity hmuh loh chhante kan han chhui chiang a, lirtheiin line a lo tihchat avangte hian buaina hi a awm veleh zauh thin. Mahse, a tam berah chuan Guwahati atanga main line tha lo hi a ni,” a ti.
Er. Lalhminghlua hian êng chhit man pek kawnga harsatna leh buaina tam tak sukiang turin P&E department hian hma an lak mek thu a sawi a. Software an hman lai chu thlak an tum thu leh cloud base service-a kalpui an tum thu sawiin, “Guwahati nena in-link tawh lovin, data-base hranpa kan nei ang a. Hetah hian internet kaltlanga tih mai tur kha a ni tawh ang. Hemi atan hian sorkar pawhin sum mamawh min pe dawn niin kan hria,” a ti a, cloud base service hi thingtlang hmun thenkhatah chuan an kalpui tan tawh thu a sawi bawk.

Leave a Reply

Your email address will not be published. Required fields are marked *

error: Content is protected !!