EDITORIAL 27/11/21


Two wheeler taxi permit pek chhuah leh hi a hun rih lo


Aizawl Two Wheeler Taxi Association (ATTA) chuan tun hnai khan sorkar in two wheeler taxi permit pek a tum leh nia sawiin, duh lohna lantir nan flag dum an zar hlawm a, an hmalakna hian awmzia a awm lo a nih chuan a tul anga hmalak zel an tum thu an sawi bawk a ni.
Khawpui kawng tawtzia leh lirthei tam tawhzia kan hria a, chuta kara a tipung zawnga hmalakna awm hrim hrim hi ngaimawh tham a ni a, tin, ATTA lam sawi angin eizawn nana hmang tak tak an awm laia induhsakna avanga permit lo nei ve ngawtte vanga buaina an tawh phah leh eizawnna ni lo, hralh lehchhawn atan vela inpek leh ringawt awm thin hi khawsak harsa zawkte dinhmun hriatthiam lohna lian tak a ni bawk awm e.
Permit pekchhuah leh chungchangah chief minister pawh an hmuh tawh thu leh permit pe chhuak tawh rih lo tura an ngen thu ATTA chuan an sawi bawk a. Chief minister pawhin, “Covid hripuiin min tibuai a, rei tak hnathawk thei lovin in awm a, nunphung pangngaiin in kal ve leh dawn chauh a, hetihlaia permit pek chhuah leh chu kan la ngaihtuah lo,” tiin a lo chhang nia sawiin, tuna permit pek chhuah tumna a awm leh si chu an hriatthiam loh thu an sawi bawk a ni. An dinhmun atanga thlir phei chuan permit pekchhuah leh tumna thawm awm hi thinrimthlak tak a ni bawk.
Kawng chhawng kan la nei hlei thei lo a, two wheeler taxi stand lah siam belh a la ni bawk hek lo. Mamawh ngawih ngawihtute kara induhsakna avanga nei ve ngawtte lo tlakzehtir tum ve chhen hi ennawn a tul a, kan ram dinhmun thlir tel chunga mamawh ti tlem zawnga ke kan pen hi a hun tawh hle a ni. Sorkar pawh hian ngaihtuahna fim hmang lul teh se.

Leave a Reply

Your email address will not be published. Required fields are marked *

error: Content is protected !!