Prime Minister Narendra Modi-a’n hnuh kir a nih tur thu puang tawh mah se lo neitu sang tel chuan Zirtawpni khan farm law pathum duh loh an lantir kum khat a tlin champhaah nasa takin duh lohna an lantir zui leh.
State lian tak taka inthlan hma lawkin, Zirtawpni kal ta khan Modi-a hian nikuma pass tawh dan pathumte hi tun thla tawp atanga parliament thutkhawm tan turah hnuh kir a ni dawn tih a puang a. Lo neitu pawlte chu lawm hle mah se dan anga hnuh kir a nih hma chian duh lohna lantir zel an tum.
Modi-a sorkar hian lo neihna kaihhnawih dan thar pathum hi September, 2020 khan pass-in heng dan hmang hian lo neihna thil chu tihchangkan a ni dawn tih an sawi a. Lo neitute sum lak luh tipung thei tur leh an thar chhuah hralhna tura duhthlanna zalen an neih theihna tur a nih thu a sawi bawk.
Lo neitu pawlte erawh chuan nakin lawkah India rama lo neitu sang tel chu mi hausa thuhnuaia an luhna mai tur leh sorkarin an thar chhuah miin an leisak theihna tur man hniam ber a tuksak thin, minimum support price (MSP) tihbona tur niin an ngai tlat thung.
Nikum November 26 khan lo neitu sang rual, a tam ber Punjab, Haryana leh Uttar Pradesh mite chuan New Delhi panin farm law thar pathum hnuh kir an ngiat a. Khawpui daiah dan niin a panna kawngpui lian pathumah an inkulh zui a, hemi hnuah hian he hmun hi an chhuahsan tawh lo.
Zirtawpnia kum khatna a lo tlin khan ram chhung hmun hrang hrangah tractor-a kawng zawh leh pun khawmna dang an huaihawt a. Modi-a’n tawngkaa dan hnuh kir a tiam chu an duhkhawp lo.
“Tunah hian tumah hloh leh chak kan awm lo; mahse, sorkar hian inbe turin hma a la tur a ni,” tiin Bhartiya Kisan Union hruaitu, Rakesh Tikait tiin kar tir khan a sawi.
“Sorkar hian thinlung thianghlimin dawhkan rawn hnaih sela, a chin felna kan zawng tur a ni,” a ti.
Prime Minister Modi-a chuan Zirtawpni kal ta khan dan thar siam takte chu hnuh kir a nih tur thu puang mah se lo neitute hian parliament-ah dan ang taka hlih a nih hma chuan duh lohna lantirna hmun chhuahsan an tum lo va, a sawi ringawtah Modi-a an ring zo lo.
“He pa hi kan ring lo,” tiin Bihar-a Madhubani district atanga Ghazipur pan, lo neitu kum 87 mi, Abdesh Kumar Jha chuan a sawi.
“Modi-a hi lal, a thu sawi apiang dan ni nghal a ni lo va, lal rorelna ni lovin mipui rorelna ram kan ni a. Parliament-a dan pass a nih angin parliament-ah vek hlih kan phut a ni,” tiin a sawi.
Thawhtanni pawh khan India rama mihring tam berna, Uttar Pradesh khawpui, Lucknow-ah lo neituten kawng an zawh a. He state-ah hian kum thar tirah inthlan a awm dawn a, Modi-a BJP-in thuneihna chan ngei an inbeiseina a ni.
Uttar Pradesh khawthlang lama mi, lo neitu pawl hruaitu thiltithei tak, Tikait-a chuan an thil phutte tihhlawhtlin a nih loh vaih chuan inthlanah hian BJP do zawnga an campaign tur thu a lo sawi tawh.
Lo neitute hian dan anga MSP kalpui leh bakah tui laknaa an hman nasat tak, electric bill lak dan thar siam tur chu hnuh kir an phut bawk.
Kum khat zet dan thar duh lohna an lantir chhunga lo neitu mi 700 dawn thi chhungte hnenah zangnadawmna pek ngei an phut bawk.
Lo neitute hian New Delhi boruak tibawlhhlawhtu ber pakhata puh, a thenawm hnai state-a lo neituten an lo hal khuk avanga sorkarin pawisa a chawitir thin tihtawpsak an duh bawk.