Tripura-a ram leilung fa party hrang hrangten TIPRA (Indigenous People’s Regional Alliance) kaihhruaiin November 30 leh December 1 hian New Delhi-ah an tana state hran ngiatna an lantir dawn.
TIPRA chairman leh Tripura lal thah, Pradyot Debbarman chuan Zirtawpni khan Agartala-a thuthar lakhawmtute a kawmnaah hei hi a puang.
New Delhi-a Jantar Mantar-ah Tripura atanga kal mi 1,500 chuangin an chenna tur state hran, Tipraland siam ngiatna hi an lantir dawn tih a sawi a ni.
Debbarman hian party a din a, hei hi Indigenous People’s Front of Tripura (IPFT) tih niin an state-a sorkar lai, BJP thawhpuitu an ni nghe nghe.
Delhi-a state hran ngiatna lantir tumte hian Inrinni hian an pan dawn a ni.
“Delhi hi Agartala atangin ‘Delhi Abhiyan’ nei turin kan pan dawn a. Mi 1,500 dawnin kan pan ang a, Jantar Mantar-ah state hran ngiatna hi kan lantir dawn a ni,” tiin TIPRA chairman Debbarman chuan a sawi.
“Kan thil phut chu a chiang reng a. Greater Tipraland a ni a, parliament-ah 125th Amendment pass a ni a, Kokborok tawng tana Roman script pawm leh Citizenship (Ammendment) Act hlih leh Thansa phutna a ni,” a ti.
“IPFT pawh an lo tel dawn a. Kan lo sawi fo tawh angin Delhi kan pan a nih chuan party hrang hrang angin kan kal dawn lo va, pakhat kan ni ang. IPFT leh TIPRA Motha hian thukhat kan vua ang ang a, memorandum thuhmun kan thehlut bawk ang,” tiin Debbarman chuan a sawi.
Hetih lai hian TIPRA chairman hian a party leh IPFT chuan a huho bawkin ram leilung fate tana state hran ngiatna hi Tripura-ah lantir turin an inbuatsaih mek tih a sawi bawk.
“Keini, IPFT leh TIPRA hian Tripura ram leilung fa, he ram neitu ngeiten anmahni puala ram an neih theihna tura nawrna huaihawt turin kan dan tur kan ngaihtuah mek a ni,” a ti.
Kumin October thla tirah khan Tripura-a ram leilung fate telna political party-te hian inzawm khawmin anmahni pual tur, ‘Greater Tipraland’ siam a nih ngei theih nana nawrho turin inremna an lo siam tawh a ni.